Federer-i Murray ajangteta World No. 2 akümer

Paris, May 09 (Agencies): Switzerland nunger tennis asayar mongin, Roger Federer-i Britain nunger Andy Murray ajangteta World No. 2 akümba osang tanü, Hombar nü adoktsüba ATP Rankings osang ajanga jangjaogo.
Defending champion, Murray-i yashi, Deobar nü tembanga Spain kübok Madrid nung asayaba Madrid Masters asayamong nung takok marok monguteti bilemba ama shilem magitetba yong pai tsünglangleni jenjang ka lua tang World No. 3 akümer lir.
Spain nunger Rafael Nadal madak final asaya koka, Madrid Masters asaymong takok marok agizüksang, Serbia nunger Novak Djokovic-i tan agi Masters takok marok 29 buba tashi akoker asayar küma maneni World No. 1 abentsü jenjang ngua lir.
Australia nunger asangur, Nick Kyrgios-ia Madrid asayamong quarterfinal asayatsü jenjang anguba sülen ATP Rankings top 20 nung tanaben densemtsü jenjang nguogo.
Ano külen, final asaya nung tamakok ngua tebur doubles takok marok maneni agizüktsü jenjang mongutetba yong India nunger Rohan Bopanna tsünglangleni jenjang 2 tashi lua tang tebur doubles tarsen nung World No. 13 akümba osanga jangjaogo.
Bopanna-i taküm June ita 6 nü tashi nung tebur doubles tarensen top 10 nung densemba ajanga dang pai taküm August ita asayatsü ayongba Rio Olympics nung shilem agitsü jenjang angutsü.
Tebur ATP Rankings Top 5 tarensen yamai lir:
1. Novak Djokovic (SRB) 16,550 points
2. Roger Federer (SUI) 7,525 (+1)
3. Andy Murray (GBR) 7,525 (-1)
4. Stan Wawrinka (SUI) 6,380
5. Rafael Nadal (ESP) 5,675