Federer o Nadal nati aroki lungjemer Laver Cup asayatsü

New York, August 25 (Agencies): Alimar tebur tennis asayar mongin, Roger Federer aser Rafael Nadal nati aroki lungjemer Laver Cup tennis asayamong tebur doubles tetoktepba nung shilem agitsü renemogo.
Laver Cup ya Europe aser ‘Rest of the World’ telok na tsüngda asayaba Ryder Cup asaya yimya nung asayatsü renemba tennis asayamong tasen ka lir aser iba asayamong ya Czech Republic yimtiba, Prague nung sangküm, 2017 küm September ita 22-24 nü tashi mezüngsüa asayatsü renema lir.
Iba asayamong lapokba sentong US kübok New York yimti nung yashi, Bodbar nü agi aser aroki lungjemer Grand Slam takok marok 31 tashi ajangzüker, Switzerland nunger Federer aser Spain nunger Nadal nati iba asayamong nung shilem agitsü osang metetdakja liasü.
Taoba mapang Grand Slam takok marok agizüker, Sweden nunger Bjorn Borg Europe telok aser America nunger John McEnroe Rest of the World telok captain shimogo.
Calender Grand Slam ta ajaba kasa küm nung Australia Open, French Open, Wimbledon aser US Open takok marok 4 prongla tesüsa, 1969 küm agizüksang, Australia nunger Rod Laver nüngtem nung Laver Cup ya ayonga lir.
Federer o Nadal na den külemi, temaba jenjang abener, Serbia nunger Novak Djokovic aser Britain nunger Andy Murray nata iba asayamong nung shilem agidaktsütsü asoshi tena ajungshitsü alizüng tayongeri yua lir.
“Nadal den aroki lungjemer asayatsü maongka anguba atema kanga pelar,” ta arishi küm 35 tain Federer-ia metetdakja liasü.