Federer o Serena nati IPTL nung shilem magitsü lemteter

New Delhi, December 06 (Agencies): India nung senpak 500 aser 1000 tejen agientsü lemtetba ajanga rongsenren jenjang mejungi akümba sülen nungtugu tennis asayartemi International Premier Tennis League (IPTL) asayamong nung shilem magitsü lemtetba osang ka IPTL tenzüksang, Mahesh Bhupathi-i tanü, Mongolbar nü metetdaktsüogo.
“India nung rongsenren jenjang mejungi akümba ajanga Switzerland nunger Roger Federer aser America tsür, Serena Williams na densema, nungtugu tennis asayar aikati IPTL asayamong shilem nung magitsü lemtetogo aser iba ajanga IPTL asayamong bilemba ama takok ngua magitettsü akok,” ta pai ashi.
Federer IPTL asayamong telok ka nung danga züngsema meliasü saka pai Indian Aces telok tenüng nung asayatsü imla liasü aser Serena-ia Singapore Slammers telok tenüng nung toktepa shilem agitsü ta bilema aliba osang angazükogo.
“Onoki taküm tetsükdaktsü jenti ajurutsü tenzüka lir saka tetsükdakba ajunga kokteta aotsü imlar. India nung rongsenren jenjang mejungi akümba aser senotsü bilemba ama peria mamshitetba indang Federer aser Serena naprongla den lemsatepogo. Tenati 1 aser 2 buba IPTL asayamong nung takok tulu ngua shilem agiogo aser tarutsü mapanga iba asayamong nung shilem agitsü imlar,” ta Bhupathi-i shisem.