Federer o Wawrinka nati Davis Cup nung shilem agitsü

Paris, July 25 (Agencies): Netherlands nung taküm September ita asayatsü ayongba Davis Cup World Group asaya nung par Switzerland linük tenüng nung shilem agitsü renemba osang ka Roger Federer aser Stan Wawrinka nati tanü Honibar nü metetdaktsüogo.
“Künati ozü linük tenüng nung Davis Cup asayamong nung shilem agitsü renema lir. Ozü teloki takok angutsü nükjidong tulu yur terenemshiba agitsü sentonga renemogo,” ta Federer o Wawrinka nati osangbener den ajururtepdang metetdaktsü.
Tenati yaküm 2014 küm November ita nung France madak takok ngua par Switzerland asoshi mezüngbuba Davis Cup takok marok bener aruja liasü.
Ajisüaka, Grand Slam asayamong balala nung shilem agitsüsa akümba yong par Switzerland-i tamakok ajurua taküm asayaba Davis Cup mezüngbuba round nung tenati shilem magiteti süidaktsüsa aküm.
Taküm September ita 18-20 nü tashi asayatsü renemba Davis Cup asaya nung takok anguba teloki telok 16 densemba World Group nung züngsemtsü jenjang angutsü.