Femina Miss India final nung Kaheli Chophy-i Nagaland tenüng nung shilem agitsü

Kohima, May 12 (TYO): 2014 Miss Nagaland 1st runners-up aser 2015 Ponds Eclectic Model Hunt 1st runners-up, Kaheli Chophy-i Mumbai nung Femina Miss India final 2017, June 25 nung shilem agitsü renema lir.
Iba show ya Colours TV nung sayutsü.
Nagaland nungi Femina Miss India nung shilem agir ya Akuonuo Khezhie sülenbo Chophy ya lir. Guwahati, Assam nung March 19 nung Femina Miss India atema shimba mapang la ya Femina Miss India Nagaland 2017 shimtet.
Mumbai nung Femina Miss India 2017 nung tokteper parnok 29 den tokteptsü asoshi Kaheli ya May 25-nü abusotsü.
Femina ya Times of India Group indang lir aser India nung state ajunga nungi kasa shilem agitsü asoshi state shia nungi kaka shimteta liasü.
Dream Café, Kohima nung osangbener den jembidang Nagaland tenüng nung national level nung shilem agitsü maongka agütsüba asoshi Tsüngrem aser Beauty & Aesthetic Society of Nagaland (BASN) dang kanga pelar ta lai ashi.
Audition mapang aser la shimtetba mapang bilemteta jembidang, “Kolkata nung March 29 anogo iba korang semtsüba sentong nung tetokteper ajak nem mapa tulu asem-sem lemzüktsü,” ta Chophy-i ashi.
“Mezüngbuba mapa ji Gateways of Nagaland nung tetsütebu mapang nungi amshia aruba yimsü, sobaliba aser chiyongtsü sayutsü. Tanabuba mapa ‘beauty with a purpose’ nung kaket reju ajunga aser meta talang nung aliba yimtsüngtem sema jajatsü liasü. Tasembuba mapa ya ‘national costume’ lir aser iba nung BASN ajanga designer anepalutsü saka iba mapa tang tashi metemteti inyaktar,” ta lai ashi.
“Sorkar aser nüburtem nungi teyari peria mongutetba ajanga iba mapa kera metenzüktet,” ta Chophy-i ashi.
Mizoram nung la ama kasa contestant bo teyari lenmang balala nungi angu, saka Naga nungeri ‘beauty pageant’ kangabo meyarir anungji iba yimya melenshia nüburtemi yaria, sarasatemtsütsüla, ta lai Naga nungertem ayongzükba o shisem.
“India tesem balala nungi sempet balala aketer aser teyakyak tetsürtem den tetokteptsü ya kanga tesashi aser tasak asütsü saka ni iba konang tulu angateta ni akokba tashi tajungtiba nung shilem agitsü,” ta Chophy-i nangzük.
Femina Miss India Nagaland 2017, Kaheli Chophy indang ‘vital statistics’ ya 33-26-35 aser tar feet 5.6½ lir. La ya Shillong nung aliba St. Peter’s College nungi Political Science nung Post Graduate lir.
Social media nung ajemdaker ‘Miss Multimedia’ shimtsü, anungji Nagaland nung aliba nüburtemi la indang Instagram, Twitter aser Facebook nung ‘follow’ asütsü asoshi mepishia ashi. Item social media nunga la indang account tenüng Kaheli Chophy alitsü.