Femina Miss India nung Rajkanya Baruah-i vote aika angutsü tenzükogo

Guwahati, March 17 (Agencies) : Femina Miss India 2016 atema vote agütsüba sentong taoba hopta nungi tenzükogo aser #RabblerMissPopular award atema vote agütsütepba nung Guwahati nungi Rajkanya Baruah-i vote timba anngutsü tenzükogo.

January ita Femina Miss India Kolkata nung takok anguba sülen tetokteper rongnung tajungtiba 21 rongi kecha tetsükdaktsü meli aila, Rajkanya Baruah-i tang la den tongteper dang nungi noklang nung shilem 30 agi vote timba nguteta la vote timba lir.

International Business Marketing aser HR nung MBA züngtemer alila, Rajkanya Baruah-i Femina Miss India takok korang Northeast-i bener arutsü imlar. Iba tetoktepba tatembang sentongji Mumbai nung April 9, 2016 nü akatsü renema lir.

Iba tobur ajung toktepba sentong nung Rajkanya Baruah indang sobutsütemji, fashion designer Nandini Baruva-i ngutetba ‘KIRAMEKI’ brand-i renemtsüba lir.

“India nung tetoktepba tulutiba rongnung ka nung Rajkanya Baruah shilem agitsü tenzükdang la sobusolemtsü tapu ajak KIRAMEKI-i renemtsür. Ni la takok angutsü tamang akar,” ta Nandini-i ashi.

Royal Group of Institutions nung zünga alila, Rajkanya dang la den külem zünga alirtemia la den takok angutsü asoshi meranga inyakang ta lemsatepogo.

Royal Group of Institutions nung Principal, Dr B Banerjee-i, “Rajkanya Baruah ya RGI nung zünga liasü aser lai Assam nem konang bentsür aruogo. Mumbai nung Femina Miss India 2016 tatembangba tetoktepba nung la takok angutsü asoshi onok, RGI-i sarasademtsür. Onok temeim aser temoatsü la den teti dena lir,” ta ashi.

Yimti nung beauty salon mezüng lapoker rongnung ka aser iba salon, Darpan kibutsüla, Papori Dutta ya Rajkanya tejen medemtsür ka lir aser lai, “Onok Darpan nungi inyakertemi tetsür ajak tereprangtsü tajung aser tobur tajung amai bilemba dang amanger. Rajkanya ya tejak tereprangtsü ajungba dang masü saka la kanga techira tetsür ka aser la dak nükla tajung jenti lir. Ibai la asoshi maongka tajungtibaji lir. La iba maongka ya mechioki takok angtsü merangtsüla. Darpan nung inyaker ajak final osang kanga yongyaseta atar,” ta ashi.

Takümbbo ‘Rabbler app’ ajanga nüburtem ajaki Miss Popular award atema vote agütsütettsü aser Miss Multimedia korang atema Mobstar ajanga vote agiteptsü. Item app tem ya Android aser iOS nungi angadi download sütettsü. Rabbler nungji ‘paid feature’ ka lir aser ibaji ajanga pai/lai vote asüba jangja metetdaktsür. Iba metetdaktsüba ajanga pa/la tenüng fbb Femina Miss India 2016 den külemi chiyungtsü atema lucky-draw kati tenüng aitsü.

Rajkanya asr tetokteper shia nem vote agütsütsü asoshi www.VoteRajkanya.com lapoker nai vote agütsünüba tetoktper noksa nung click asüstüla. Iba sülen pa/lai pei phone no nemoktsü nung One Time Password (OTP) ka yoktsü. Aser iba OTP ji nemoktsü nung nai vote asüba jangjatsü.