FGN & NBCC nati 52 buba Indo-Naga Ceasefire Day amung

Chedema, September 6 (TYO) : Deobarnü Naga nungertemi 52 buba Indo-Naga Cease Fire Day mungogo. Nagaland Baptist Church Council (NBCC)-i acha-ayanga Federal Government of Nagaland (FGN) aser India sorkar tsüngda tenangzüktep agiba sülen nungi Nagaland nung Peace Day mungyonga arur.
NBCC-i tentetba Nagaland Peace Mission-i mapa inyakba sülen 1964 küm iba anogo nung NNC/FGN aser India sorkar na tsüngda prangpong amer raraba anentsü tenangzükba agitep. Nagaland Peace Mission nung züngsemtemji taoba Assam Chief Minister Bimala Prasad Chaliha, nüjiso atema rarar Jayaprakash Narayan aser England nunger Reverend Michael Scott nungertem liasü.
“Mitkartem tsüngda raraba ajanga Naga yimten tebilemtsü atema telangzüba mangutsü ta Arogoi bilemba agi Peace Mission tenzük” ta taoba NBCC Peace Director, Reverend L Kari Longchar-i ashi.
State yimtiba Kohima nungi kilometer 8 shi pilar aliba Chedema Peace Camp nung FGN aser NBCC nati külemi ayongzüka agiba Peace Day sentong nung tongti o jembir Rev. L Kari Longchar-i iba o jembi.
September 6, 1964 nü FGN aser India sorkar tsüngda ceasefire nangzüktepbaji benjung anogo ka ama aser tepela anogo ka liasü, ta paisa ashi.
Tawa Naga yimten telok aikati India sorkar den ceasefire tenangzükba agitepogo. August 1, 1997 nü NSCN(IM) aser India sorkar tsüngda ceasefire tenangzükba agitep aser iba sülen nungi Prime Ministerial level nung olemtep 80 jungnüa liogo, ta tongti o jembirisa metetdaktsü.
Taküm August 3 nü India sorkar aser NSCN(IM) tsüngda Peace Accord indang onük jembidang Rev. L Kari-i, Naga nungertemi iba inyakyim ajanga temeim, tepela, yimjung, putepshiba aser ochi obendang bener arutsü ta sarasademtsüla aser teimla ayutsüla, ta ayongzük.
“September 6 ceasefire tenangzükba agiba sülen küm 51 buba nung tanü asenok Naga nungertemi ajangshia arubatem ochi agi, tasü itta aser ajemalua meyipa reprangshidi. Asenoki dak tim tangatetba lira, kija, telok aser kin ajaki pei taküm aser inyaka aruba mapatem meyipa reprangshitsü nüngdak” ta Rev. L. Kari-isa ayongzük.
Naga nunger tensa tebenja kümogo aser taneptsü bener arutsü atema mapa aika inyaktsüsa akümtsü. Ano, asen khurettem koktetsübaji yimten lennir kari dang masü saka nisung ajaki shilem agitsüla, ta paisa ashi.
Telok ka mesüra tentet kati dang Naga nunger khuret koktettsü ta teimla mayutsüla saka jenjang ajak nung bangdakpurtemi tajungtiba atema inyaktsüla, ta tongti o jembirisa ashi.
Tanü agiba sentong nung FGN Tatar Hoho speaker, Lhouvitsü-ia tesentepertem ayongzüka jembi aser Naga yimten tebilemtsü tekaratiba nung telemtetba agitsü atema temoatsü meshia sarasademba mapang agi.
Sentong nung mendenji NBCC Office Manager, Thekrulezo Nagi liasü, Accounts officer, Pesha Khiamniungan-i Lai zünga sarasadem aser Jotsoma Baptist Church nungi tetsür telok kati ken aten.
Naga nunger lennirtem aika den FGN president General (retd) Viyalie Metha aser NNC president Adinno Phizo naprongla sentong nung aden.