FGN & NSF nati Naga Independence Day amung

Kohima, August 14 (TYO) : State yimtiba Kohima nung Federal Government of Nagaland (FGN) aser Naga Students’ Federation (NSF) nungertem tesem balala nung 69 buba Naga Independence Day mungogo.
1947 küm iba anogo nung Naga nungertemi nüjiso sangdong aser linük balaka asütsü telemtetba agia liasü.
Chedema Peace Camp nung sentong agidang, FGN Tir, General (retd) Viyalie Metha-i ashiba agi, “1950s aser 60 nung linük aika nüjiso mangudang Naga nungertem nüjiso ngur liasü. Ajisüaka, India nunger mitkartemi makbangba aser asen litsü atsünga agiba agi, tesüiba küm 68 tashi asenoki asen azü aser nüktzü alua asen nüjiso kümzüka ayutsü atema raratsüsa akümer.”
“1950s tom ka nung India sepaitemi asen linük amak aser iba sülen nungi Disturbed Area Act of 1955, Armed Forces Special Powers Act 1958 aser Unlawful Activities Prevention Act 1967 ozüngtem amshia India sepaitemi asenok madak tashi amshir” ta paisa ashi.
Naga nüjiso kümzüka ayutsü atema raradang Naga nunger meyirjang aika taküm bendanga agütsüogo. Anungji Naga nungertemi tasür ajak nem akhümtsübu agütsütsüla, ta Metha-isa ayongzük.
“United Nations Organisation dena onoki shinga dang nungia nüjiso memeshir. UNO dena asen kidangsüa aliba linüktemi Naga nunger nüjisoji agizüktsüla” ta pai ashi.
Mapang talangka Indo-Naga mangatettep ya India linük sasep nung khuret ka masü aser Naga nunger ya telungpurtem masü. Ajisüaka, iba ya alima sasep nung mangatettep ka lir. Iba ya India-i linük tanga ka makbangba lir aser Naga nungertemi Naga linük kümzüka ayutsü meranger dang, anungji iba mangatettep ya alima sasep nung angatetteptsüla, ta FGN Tir-isa metetdaktsü.
Naga linük indang puti otsü aser yimten temeten ayutsü atema Naga nungertemi tentetba sorkarji NNC aser FGN dang lir. Anungji telok kari Naga nunger senso tangar linük ka nem agütsüba inyakyimji NNC aser FGN nati kodang magizüktsü aser iba inyakyim nung shilem magitsü ta Metha-isa ashi.
NNC aser FGN nati Naga nunger temeten aser nüijso kümzüka ayutsü, ta Metha-isa metetdaktsü.
Iba sentong nung mendenji Kilo Kilonser, Shevohü Keyho liasü aser Rev. Savito Nagi-i temoatsü meshia sarasadem.
Sentong nungsa Chedema Women Group, Khomi Village Chakhesang Region, Jakhama Youth Society and Col. Ala & friend nungertem ken aten, FGN Tatar Hoho speaker Lhouvitsü-i anküp tepela o jembi aser NNC Tir Adinno Phizo den FGN/NNC tongti ketdangsertem aser public aika aden.
Ano, Naga Solidarity Park nunga Naga Students’ Federation (NSF)-i Independence Day sentong ayongzüka agidang, taoba NSF Tir, Achumbemo Kikon-i ashiba agi, “NSCN(IM) aser India sorkar tsüngda tenangzüktep agiba ajanga Naga nungertemi kopi melii ajaki mulunga agizüktetba telemtetba ka agitsü tamang akar.”
Naga yimten khuret atema telemtetba ka agitsü asoshi mezüng teinyaktsü tenzükogo aser NSCN lennirtemi Naga nungertem den asüngdangyatepa aser olemtep lia ajaki mulungtepba sülen ang tatembang telemtetba ka agitsüla, ta Achumbemo Kikon-isa ashi.
Iba denji külemi, Naga nungertemia küm aika India sorkar dak temulung melemteti aruogo aser kechiba India sorkari nendak meinyaker ta asüngdanga aruogo. Küm 18 tashi yimten khuret atema telemtetba kecha makai olemtep dang süa arur tanü langka ka kümtetdang, tangatetba tajung nung iba inyakyim agizüktsüla aser iba maongka agir India den tesüiba mapangtem ama masü saka telemtetba tajung ka agitettsü atema yariteptsüla ta paisa ayongzük.
India sorkar aser NSCN(IM) tsüngda tenangzüktep agir inyakba mapa nung telok anaprongi tanga Naga yimten teloktem aser public den tesentaktep yanglua, iba tenangzüktep nung tetezü keta tembanga jembitettsü asoshi inyaktsüla ta Kikon-isa metetdaktsü.
Tanü agiba sentong nung mendenji NSF secretary education, Imtiyapang liasü, Kohima Ao Baptist Arogo sannüker Rev. I. Yapang Walling-i temoatsü meshia sarasadem, NSF general secretary Boveio Poukai Duo-i okila jembi aser Secretary Social & Culture Boketo Kiho-i anküp tepela o jembi.