FIFA 2022 Qatar World Cup asayatsü anogo lateter

Zurich, September 25 (Agencies): Qatar nung asayatsü ayongba FIFA 2022 World Cup November ita 21 nü nungi December ita 18 nü tashi asayatsü lemtetba osang ka alima ajunga nung football asayabaren ketdang asüba telok, FIFA-i tanü Hokolbar nü metetdaktsüogo.
Switzerland kübok Zurich yimti nung par sanen luden tanü amendang iba telemtetbaji agia liasü.
2022 World Cup final asaya Qatar’er National Day anogomong among nü, December 18 nü asayatsü lemtetba osang ka FIFA-i taküm 2015 küm March ita metetdakja liasü.
Aji oda, iba asayamong tenzüknü tanü latetba ajanga Qatar World Cup asayamongji tanga mapang asayaba den anogo 4 agi tajemba asayatsü asoshi tan renemer lir.
Gulf lima tentetba Qatar nung anü tatsük maremtettsüsa apuba yong June aser July ita asayaa aruba World Cup asayamongji Qatar nungbo küm tatemlen, asükwa mapang ang asayatsü lemtet.
Ano külen, taoba mapang, 2010 küm tashishitsü keta Qatar nem 2022 World Cup aser Russia nem 2018 World Cup asayamong ayongtsü temeten agütsüba den sentakba bushisüngdang sentong ka Switzerland sorkari tang tenzüka aliba osanga jangjaogo.
Süpokrem sen agizüka par linük ana nem iba temeten agütsü ta temulung malemba yong agiba bushisüngdang sentongji tembangba sülen bushisüngdangertemi aibelena inyakba kuli tejangja ngutetra, Qatar aser Russia na nem tan agüja World Cup ayongtsü temetenji meyipa agiadoktsü akok ta FIFA ketdangsertemia metetdaktsüogo.