FIFA asaya nung video technology mezüngsüa amshi

Tokyo, December 08 (Agencies): Kashima Antlers teloki goal 2-1 agi Auckland City telok madak takok ngua, Club World Cup preliminary round asaya tanü, Brehostibar nü asayaogo.

Tanü asaya nung video technology amshia liasü aser ibaji tongti FIFA asaya nung tan mezüngsüa video technology amshir aküm.

Emiliano Tade-i metsüoktsüba free-kick ball agizüka, Kim Dae Wook-i pa tekolak agi tongokja, par Auckland telok asoshi 1 buba goal asaya tanabuba shilem tenzüker minute 5 buba nung agütsü.

Ajisüaka, Kashima asayar, Shuhei Akasaki-i külem asayar, Ryota Nagaski-i renemtsüba cross ball agizüka, goal agütsüba ajanga par telok anaprongla kasa jenjang aküm.

Tanüngba asaya mapang nung telok anapronglai goal agüja, temaba jenjang monguteti takoker shimtsü atema asaya mapa tali agütsüsemtsüsa alidang Mu Kamazaki-i pa tekolak agi tongokja, asaya tembangtsü minute 2 shi anüng alidang 2 buba goal agüja, par Kashima telok nem takok ngudaktsü.

Kashima teloki tan takok anguba sülen African champions, Mamelodi Sundowns telok den quarterfinal tie asaya tan Deobar nü asayatsü lemzükogo.

FIFA asaya nung tan mezüngsüa video technology amshiba ya Video Assistant Referees (VAR) ta ajar asayadak temalen nungi tetendangertemi obendang shitak magütsütettsüsa asaya tatalokbatem video nung tanaben reprangshir tongti referee yaritsü mapatong tenzüker lir.

Iba mapatong kübok tongti referee-ia asayadak tezülen yutsüba monitor nung asaya tatalokbatem tanaben reprangshia, ochi obendang agütsütsü temelaba agüja lir.

FIFA tenteti iba tasa tasen ya 2018 World Cup nung tongtipangsüa amshitsü sentong lir.