FIFA Ethics Court-i Blatter o Platini na merenshir

Zurich, December 21 (Agencies): Alima ajunga nung football asayatsüren ketdang asür, FIFA kübok tentetba Ethics Court-i ken o kanga junga angadangba sülen football lenir, Sepp Blatter aser Michel Platini na aija taruba küm 8 tashi football asayatsüren nung shilem magitsü o bendang tanü Hombar nü agütsüogo.
FIFA Tir, Blatter aser pai anitetsang, UEFA Tir, Platini nati dollar sen million 2 tashi ochimeshi agiba ken o nung aitsüba sülen tenati tan temerenshiji agizüker lir.
Kasa ken o nung ajemdaker, Switzerland sorkaria tena anema okadak ken o benoka bushisüngdang tenzüka aliba osang jangjaogo.
Tan temerenshi agizükba sülen, küm 17 tashi Tir menden abenba densema, Blatter-i küm 40 shi tenzükba sülen FIFA lenisütsü menden maksü nung toktsütsüsa tan tia tamajung ajurur lir.
Blatter melenzüka FIFA Tir menden abentsü terenemshiba agia alisang, Platini-ia tan temerenshi anguba yong pai sangküm 2016 küm February ita 26 nü agitsü ayongba FIFA Tir election nung candidate ka ama joko shilem magitettsüsa jenjang tamajung ajurur lir.
Ajisüaka, tena nem tan agütsüba temerenshi ya tanaben reprangshitsü atema lenmang lapokja yutsüba ama, tenati FIFA Appeals Committee aser Court of Arbitration for Sport (CAS) na den onük benoktsü renemba osang ka metetdaktsüogo.
Taoba mapang, 1999-2002 tashi presidential advisor ka ama inyakba atema ita sen, sen million 2 tashi Platini-i 2011 küm, Blatter-i FIFA Tir menden abendang agizükba ken o nung tenati aibelena mali ta Blatter o Platini napronglai metetdaktsüogo.
Tan temerenshi agütsüba den külemi, Blatter nungi dollar sen 50,250 aser Platini nungi sen 80,400 senjia chiogo.