FIFA-i Confederations Cup melen Club World Cup aginer

Lisbon, Rongchii 18 (Agencies): Confederations Cup melena Club World Cup ya tuluba kümdakja 2021 nungi küm pezü nung khen dang ayongzüktsü asoshi FIFA-i sentong yanglutar, ta osang ka ajanga Rasemnü metetdaktsü.
Alima nung football asaya ketdangsüba telok temaba, FIFA nung tir, Gianni Infantion-i continental confederations tem dangi shidi yokba nung, Confederation Cup ya anentsü aser club asayamung ya küm shia Luchii (December) nung masayatsü, ta zülua aliba AFP ajanga angu.
Confederations Cup ama iba asayamung ya World Cup asayatsü küm ka lia Aami (June) nung ayongzüktsü.
Taoba Confederations Cup ya Russia nung asaya aser iba mapang Germany-i akok, aser ibaji tatem asütsü südi.
Iba sentong tasenba ya inyakra, talisa Europe nung club jenjang nung tetoktepbatem ya tanga football asaya den aiben majuruteptsü.
World Cup ya kanga nüngtugu aser nisungtem atsür arutsüsa ayongzüka amunger, saka Confederation Cup aser Club World Cup bo yamaji masü aser sponsor-a tajung mongutetba khuret ka FIFA-i ajurur.
Club World Cup nung confederation trok nungi club tem arua asayar, saka iba asayamung nung Europe aser South America nungi arurtemi dang koka lir.
Club World Cup asaya tenzüker mezüng küm asem Brazil teloki akok aser tetsüsa 11 ben asayaba nung khen dak alaka Europe nungi tanüngba asayamung ajak koka lir. Europe dak alaka tanga continent nungi iba asayamung takok anguba ya Corinthians temi asayamung mezüng tenzükba küm, 2000 aser 2012 nung koka lir.
Taoba küm Luchii (December) nung United Arab Emirates nung asayaba mapang Real Madrid-i iba asayamung takok marok mezüngbuba atonga ngutet. Iba asaya nung Brazil nungi Gremio Porto Alegre den asayaba mapang Madrid nungi Cristiano Ronaldo-i goal ka agütsüteta akok.