FIFA-i Iraq nem tenokdangba agütsür aliba aginogo

Bogota, Metsüremi 17 (Agencies): FIFA-i küm semer tashi Iraq nung international football asaya masayadaktsüi nokdanga aliba aginogo.
“Onoki Arbil, Basra aser Karbala yimti tem nung international asaya tem asayadaktsütsü,” ta FIFA tir Gianni Infantino-i Bogota nung FIFA Council senden akaba sülen osangbenertem dang ashi.
Item yimti asem nung taoba küm tem nunga security asadanger friendly asayatem asayatsü asoshi temelaba agüja aruogo.
Metsüremi 21 nungi tenzüka Basra yimti nung Iraq-i ayongzüka Qatar aser Syria den friendly asayamung ka asayatsü.
FIFA sangdong ajanga ashiba agi, Iraq nunger ketdangsertemi Baghdad nunga asayatem asayadaktsütsü asoshi mepishibabo magizük, saka Infantino-i iba ken o ya maneni asadangtsü, ta tenangzükba agütsüogo.
Yimti asem rongnung Basra aser Karbala naprongla Baghdad south len lir aser iba yimti ana ya north aser west nung security force aser Islamic State group na tsüngda rara nungi talangka pilar lir.
Arbil ya linük nung autonomous Kurdish tesem indang yimtiba lir.
Iraq Football Association puri FIFA telemtetba pelashishia agizükogo, saka linük nung Baghdad densema tanga province tem nunga iba asaya ya asayatetdaktsütsü asoshi meneni meranga inyaktsü, ta nangzük.
Ato Kilonser Haider al-Abadi shibai Luchii (December) nung IS madak takok anguba sangdonga liasü pai ashiba agi, FIFA puri tenokdangba agütsür aliba aginba ya secutiry tsütsü jenjang tajungba akümba aser Iraq nunger takok süngjang lir.
Küm aika Iraq nunger stadium tem yanglua international jenjangi meyipa arutsü asoshi nüngtugu asayartem aser football achaayangba loktitem puatsü meranga arudar.
Iba tenokdangba ya 2012 küm khen atema agina liasü saka Iraq o Jordan na Arbil nung asayaba mapang power tsütsü timtem adokba ajanga FIFA-i iba tenokdangba ya tanaben benokshi.