FIFA-i Real & Atletico Madrid telok merenshir

Zurich, September 09 (Agencies): Alima ajunga nung football asayatsüren ketdang asür, Fédération Internationale de Football Association (FIFA)-i Spain nung tentetba tongti football asayatsü telok 2 – Real Madrid aser Atletico Madrid na merenshitsü lemtetshiogo.
Arishi küm 18 tain den tanübo bendanger asayartem aniokba ken o nung ajemdaker FIFA-i Real aser Atletico telok na anema küm 1 tashi asayar tasen par telok nung manioktsü tenokdangba benokogo.
Iba temerenshi agientsü asoshi telok anapronglai benokba ken o magizüktsü lemteta, FIFA-i tenokdangba benoka merenshiba den külemi, Real telok nungi Swiss Francs sen 358,000 aser Atletico telok nungi sen 900,000 senchia achiba osang angazükogo.
Ajisüaka, par telok ana anema benokba tenokdangbaji agientsü onük Court of Arbitration for Sport (CAS) nung tatemsüa benoktsü renemba osang ka telok anaprongla nungi ketdangsertemi metetdakja lir.
Tan temerenshi anguba ajanga telok anapronglai asayar tasen anioksemtsü asoshi lapoktsüba mapang, January, 2007 aser July-August, 2017 nung asayar tasen manioksemtettsüsa tia ajurur lir.