FIFA-i South Africa o Senegal na WC Qualifier asayashitsü tetuyuba agütsü

Paris, September 7 (Agencies): Match fixing dak sendakba nung referee anentsüba sülen World Cup qualifier South Africa aser Senegal na tsüngda asaya tanaben asayashitsü asoshi FIFA-i tetuyuba agütsüogo. Iba asaya 2016 küm November ita asayaa liasü aser maneni taküm November ita asayashitsü. Iba asaya nung Ghana nunger referee-i tim masüba penalty ka agütsütsüba sülen South Africa-i 2-1 agi koka liasü.

Handball masüba ka nung penalty ka agütsüba sülen mezüngbo CAF-i Lamptey ita asem atema referee mapa meinyaktsü asoshi anentsü, saka FIFA-i pa taküm tepiyong atema mapa nungi March ita anentsüogo.

Asaya tanaben asayashitsüba ya Senegal atema osang tajung lir, shirnok African zone qualifying Group D nung tasembuba jenjang nung Cape Verde aser Burkina Faso dang nungi point ka agi tajemba lir.

Group shia nungi temaba jenjang nung tembangertem dang 2018 World Cup nung shilem agitsü asoshi indang indanga itettsü. Sport temaba okadak CAS ajanga referee, Joseph Lamptey taküm tepiyong mapa nungi anentsüba osang jangjashitsüba sülen iba asaya asayashitsüba FIFA ajanga metetdaktsü.

Kasa sangdong ajanga ashiba agi, “Iba asaya ya November 2017 international window mapang asayatsüla aser anogo tejangja mapangtong nung metetdaktsütsü.”