FIFA Rankings: Argentina temaba jenjang nung lir

London, April 07 (Agencies): Alima ajunga nung football asayatsüren ketdang asür, Fédération Internationale de Football Association (FIFA)-i ita shia adoktsüba alima ajunga nung football asayar telok tarensen nung Argentina telok temaba jenjang nung aliba osang jangjaogo.
Argentina-i Chile aser Bolivia na nung asayaba World Cup qualifying asaya nung takok anguba sülen taoba ita 5 tashi temaba jenjang abenba Belgium telok ajangteta, tan temaba jenjang angur lir.
Argentina aser Belgium na sülen anidaka, Chile teloki 3 buba jenjang nguogo.
Tan adoktsüba tarensen nung Asia nung tentetba telok rong nung 42 buba aser 50 buba jenjang abener, Iran aser Australia nati dang top 50 nung densemtsü maongka ngua lir.
Ano külen, 2018 World Cup qualifier asaya 8 nungi asaya 7 tashi nung tamakok anguba yong India telok tsünglangleni jenjang 2 tashi lua tang 162 buba jenjang nung aliba osang jangjaogo.
Asia nung tentetba telok tarensen nung India telok tang 29 buba jenjang nung lir.