FIFA Tir, Blatter bushisüngdangtsü tenzüker

Zurich, September 26 (Agencies): Switzerland sorkar ketdangsertemi yashi Hokolbar nü nungi tenzüka FIFA Tir, arishi küm 79 tain Sepp Blatter bushisüngdangba osang jangjaogo.
2007 küm nungi tenzüka Union of European Football Association (UEFA) Tir menden abensang, Michel Platini-ia sen million 2 Blatter ket nungi agizükba ken o nung ajemdaker paa bushisüngdangba osang angazükogo.
“Ochimashi aser ozüng alema inyakba ken o nung ajemdaker ozü ketdangsertemi tanü, September ita 15 nü nungi tenzüka FIFA Tir, Blatter bushisüngdangtsü tenzükogo,” ta Switzerland’er Attorney General’s Office (OAG)-i yashi Hokolbar nü sangoktsü.
FIFA nem takoksa bener arutsütsüsa Blatter-i Caribbean Football Union (CFU) nem television nung World Cup sayutsü temeten 2005 küm agütsüba ken o nung ajemdaker pa tan bushisüngdangtsü tenzüker lir.
Ano, 1999 nungi 2002 tsüngda FIFA asoshi mapa inyaktsüba atema Platini-i UEFA Tir menden benokba jakdang pa nem sen agütsüba ken o nung ajemdaker Blatter den külemi, Platini-a bushisüngdangtsü tenzükba osanga jangjaogo.
Ano külen, Blatter-i Switzerland ketdangsertem den kechisarena ajunga nung amalitepa inyakba osang ka par okatsür, Richard Cullen-ia tanü Honibar nü metetdaktsüogo.