FIFA U-17 World Cup trophy tour August 17 nungi tenzüktsü

New Delhi August 7 (Agencies): FIFA U-17 World Cup trophy bener yimti trok sema senzütsüba sentong August 17 India yimtiba nungi tenzüktsü, ta asayamong ayongba committee ajanga Hombarnü metetdaktsü.
Iba tour ya August 17 nungi tenzüka anogo 40 agia September 26 tashi senzütsü aser km 9000 shi senzütsü.
Iba asayamong asayatsü aliba yimti 6 nung aliba fan temi trophy reprangtsü asoshi maongka angutsü koba New Delhi nungi tenzüktsü. India nunger mezüngbuba asaya Delhi nung asayatsü asoshi ataa lir.
Iba trophy ya August 17 nungi 22 tashi Delhi nung sayatsü.
Delhi sülen iba trophy bener Guwahati-i (August 24-29) semdangtsü aser August 31 nungi September 5 tsüngda nung Kolkata semdangtsü, kong final asayatsüba lir. Iba sülen Mumbai September 6 nungi 10, Goa September 14 nungi 19 aser tetembangsa Kochi nung iba trophy September 21 nungi 26 tashi sayatsü.
India nung mezüngbuba FIFA asayamong ya October 6 nungi 28 tashi akatsü.
“Trophy bener yimti sema senzüba ya iba asayamong ajungketba tatembangbuba sentong asütsü aser iba sentong ya kanga tongtibang asütsü kechiyong linük nung aliba fan temi FIFA U-17 World Cup akokba teloki Kolkata nung October 28 nü agizüktsü aliba kasa trophy reprangshitsü asoshi maongka agütsütsü,” ta LOC mendenbuba Praful Patel-i ashi.
“Iba ya taküm nung khen dang ajangshitsüba maparen ka lir aser yimtitem nung iba marok sayaa aliba tesemi nüburtem aikati arua reprangtsü asoshi onoki imlar,” ta paisa ashi.
Taruba ita tsüngda nung India nung aliba fan million aikati iba trophy anasa aruru reprangtsü asoshi maongka angutsü.