FIFA World Cup 2018: FIFA World Cup 2018: Croatia aser Brazil quarter-finals tongogo

Sangtennü round of 16 nung Brazil aser Mexico na asayaba mapang Brazil nunger Neymar-i goal agütsüba mapang tangokba noksa nung angur.

Nizhniy Novgorod, Chiteni 02 (Agencies): Amungnü Nizhniy Novgorod nung Croatia aser Denmark tsüngta last 16 asayaba mapang penalty metsüteptsüsa akum aser Croatia goalkeeper Danijel Subasic-i ball aika nokdangteta par telok ya 2018 FIFA World Cup quarter-final tongogo.
Croatia nungi Ivan Rakitic-i spot kick nung aibelen masüba ajanga par telok ya quarter final nung Russia den asayatsü jangjaogo. Telok ana tsüngta mapang apulokja (extra time) sayidakjaka 1-1 nung asaya tembang.
Barcelona midfielder-i yoktetba goal ya par telok nungi Milan Badelj aser Josip Pivaric nati metsüba penalty ya Danish goalkeeper Kasper Schmeichel-i nokdangtetba sülen liasü, aser Schmeichel-isa extra time nung Luka Modric-i penalty metsüba nokdangteta liasü.
Saka Denmark nungi Danes Christian Eriksen, Lasse Schone aser Nicolai Jorgensen nungeri penalty metsüba ajunga Croatia goalkeeper, Subasic-i nokdangteta par teloki 3-2 agi koka France nung 1998 World Cup sülen tang mezüngbuba quarter-finals tongtetogo.
Telok ana tsüngta asaya tenzükdang khenyongi balaka nung asaya tenzük, saka iba sülen alakteta masayatet.
Asaya tenzüker minute pezü tsüngta telok anaprongi mezüng goal yoktsü merangba mapang goal agütsüteta liasü.
Mezüngbuba nung Mathias Jorgensen-i asaya tenzüker minute anabuba nung goal ka agütsüteta asaya junga tenzük.
Saka parnoki iba asaya akoktsü teimla ya second 90 tsüngta sama.
Nizhny Novgorod stadium nung Denmark saburtem pelatepba manendang Croatia nungeri Mario Mandzukic-i iba goal ya kepzüktet.

Asaya tenzüker minute asem ser second 37 nung telok anaprongi goal agütsütetba ya World Cup asaya otsü nung tekeratiba kümogo.
Iba sülen minute 116 ya telok anaprongi tasa balala amshia asayaka goal agütsütsü maongka mongutet aser minute 116buba nung Mathias Jorgensen -i aibelenba ajanga penalty metsütsü maongka angu. Iba penalty ya Modric-i metsü saka Denmark nunger goalkeeper Schmeichel-i iba aonung penalty asem tashi nokdangtetba rongnung mezüngbuba pai iba penalty ya nokdangteta liasü.
Maneni Tentonü Samara Arena, Samara nung Brazil aser Mexico tsüngta asayaba mapang Brazil-i 2-0 agi koka FIFA World Cup 2018 quarter finals tongogo.
Iba asaya mezüng shilem nung telok anaprongi kanga meranga asayaka telok katia goal magütsütet. Iba asaya nung Brazil nunger Neymar-i kanga junga asayateta goal yoktsü 23ben meranga minute 51buba nung par telok asoshi mezüng goal agütsütet aser paisa par telok nem goal agütsütettsüsa maongka 16ben agütsü.
Brazil nunger Coutinho melena Firmino aiter mapang talangka meindoki minute 88buba nung Brazil asoshi tanabuba goal agütsütet.
Iba asaya nung Brazil nunger midfield nung asayar Casemiro yellow card anguba ajanga pa taruba asaya nung shilem magitettsü. Brazil nunger quarter final nung Belgium mesüra Japan den asayatsü.