FIFA World Cup 2018: France, Croatia aser Brazil takok nung lir

Saint Petersburg nung Aami/June 22, 2018 nü World Cup 2018 Group E nungi Brazil aser Costa Rica na asayaba mapang tangokba noksa nung angur. Iba asaya nung Brazil-i 2-0 agi Costa Rica akok.

Yekaterinburg, Aami 22 (Agencies): 2018 FIFA World Cup Yangtepnü asaya nung France nungi Kylian Mbappe-i goal ka agütsüteta South Africa nungi küm 36 sülen tang mezüng World Cup nung shilem agiba linük, Peru ya last 16 atongtsü teimla samadaktsü.
Asaya tenzüker minute 34buba nung Mbappe-i goal ka agütsütetba ajanga David Trezeguet (20)-i otsü yanglua aliba raksaja iba asayamung nung France nunger goal agütsür rongnung tanuputisang kümogo. Arishi küm 19 tain, Mbappe-i iba goal agütsütetba ajanga Group C nungi par telok match ana asayaba nung anaprong koka lir.
Olivier Giroud-i metsüba ball ya Peru nungi defender ka dak tsükdaker adoka lia Mbappe-i Peru goalkeeper Pedro Gallese alema goal yoktet.
Saka France-i first-half nung goal yoktsü maongka aika magitet.
Iba asaya nung takok anguba ajanga France ya points trok nung lir aser kasa Group nungi Denmark aser Australia na 1-1 agi draw süa points pezü-zü nung lir.
Peru ya iba asayamung nung points kata monguteti lir.
Iba asaya mapang ka nungbo France nunger goalkeeper Hugo Lloris ya tezülen aliba ngua Peru nungi Yoshimar Yotun-i goal yoktsü merang, saka pai metsüba ball ya bar alema ao.
Maneni Paolo Guerrero-ia penalty area nung Samuel Umtiti paidokteta goal agütsütsü merang, saka pai metsüba ball ya Lloris tetsüng nung tsükdak.
Asaya tanabuba shilem tenzükba sülen Peru nungi Pedro Aquino-ia goal yoktsü merang, saka pai metsüba ball ya goal post nung tsükdak.
Maneni kasa anogo asaya tanga ka nung Argentina aser Croatia asayaba nung Croatia-i 3-0 agi Argentina madak takok angu. Iba asaya nung takok manguba ajanga Lionel Messi-er Argentina telok ya taküm World Cup asayamung nungi mapang talangka melie tsüktsü tia nung lir.
Second-half nung Ante Rebic, Luka Modric aser Ivan Rakitic nungertemi goal agütsüba ajanga takok ngua Argentina nunger ya kanga mejungi mezüngmeshiogo.
Group D nungi Argentina ya anaben asayaba nung point ka dang ngua lir. Argentina ya iba asayamung last 16 tongtettsü asoshi Group stage nung parnok tatemsa asayaba mapang Nigeria ya akoktsüla aser kasa group nungi tangartemia parnoki imlaba ama asayatsüla, aji mesüra Argentina teimla kangabo mali.
Nizhny Novgorod stadium nung Argentina nunger sapurtem kanga jashitep aser parnok rongnung Diego Maradona densema kanga aoksa.
Asaya tenzüker minute 53buba nung Argentina nunger goalkeeper Willy Caballero-i aibelenba ajanga Rebic-i mezüng goal agütsütsü maongka ngutet.
Iba sülen Real Madrid nungi asayar Modric-ia minute 80buba nung kanga junga goal ka agütsütet aser Barcelona nung Messi den külemi asayar, Rakitic-i Croatia asoshi goal asembuba agütsütet.
Iba asaya nung tamakok anguba ajanga arishi küm 30 tain, Messi-i World Cup akoktsü bongmangba amajok akümtsü ana nung lir.
Rogonü kasa asayamung Group E nungi Brazil aser Costa Rica na asayaba mapang Philippe Coutinho aser Neymar nati goal kaka agüja ponguben tashi World Cup koka aliba telok, Brazil ya last 16-i aitsü teimla tulu nung lir.
Iba asaya nung Brazil nunger nem penalty ka agütsütsü südi ta lia, referee-i Video Assistant Referee nung repranger iba penalty magütsü aser asaya ya draw nung tembangtsü südi ta aikati bilem.
Saka asaya tembangtsü anasa Coutinho-i minute 91buba nung goal ka agütsü aser minute 97buba nung Neymar-ia goal ka agütsütet.
Saint Petersburg Stadium nung iba asaya tembangba sülen Neymar bo akokba tepela agi ajep.
Iba asaya akokba ajanga Brazil ya Group E table nung points 4 bena lir.
Rogonü FIFA World Cup 2018 tanabuba asaya nung Nigeria-i Iceland madak 2-0 agi akok. Group D nungi Nigeria aser Iceland na asayaba mapang Nigeria asoshi goal anaprong ya Ahmed Musa-i agütsütet. Pai goal ana ya minute 49 aser 75buba nung agütsü.
Tanü asaya nung Nigeria-i akokba ajanga Aami/June 26 nü par telok Argentina den asayatsü aliba nung draw sütetra Nigeria ya Round of 16-i aitsü.