FIFA World Cup 2018: Uruguay-i Egypt madak takok angu

FIFA World Cup – Group A  nungi Egypt aser Uruguay na Aami/June 15, 2018 nü Ekaterinburg Arena, Yekaterinburg, Russia nung asayadang Uruguay nunger Jose Gimenez-i goal tongloktsüba mapang tangokba noksa nung angur.

Yekaterinburg, Aami 15 (Agencies): Rogonü Uruguay den World Cup asayaba mapang Egypt nunger football asayar mongin, Mohamed Salah bo masaya, aser iba asaya nung Uruguay nunger Jose Gimenez-i minute 89buba nung goal ka agütsüteta Egypt madak 1-0 agi akok.
Uruguay nungeri asaya atemtsü anasa goal ka agütsüteta takok anguba ajanga Group A nung Russia aser par telok temaba jenjang nung lir. Yangtepnü mezüng asaya nung Russia-i 5-0 agi Saudi Arabia koka lir. Taoba mapang asaya tenet tashi nung Russia nungeri khena takok mangu aser iba ajanga Stanislav Cherchesov-er telok ya Russia tir, Vladimir Putin densema kinük ajaklen nungi aija liasü.
Saka Yangtepnü Luzhniki Stadium nung terepranger nisung 78,011 adenshia alidak Green Falcons temi kanga junga asayatet. Iba asaya nung Russia nunger asayartem rongnungi goal agütsürtemji Gazinskiy ( minute 12buba), Cheryshev (minute 43buba aser 90’+1), Dzyuba (minute 71buba) aser Golovin (minute 90’+4buba) alitsü.
Uruguay aser Egypt na asaya ya jangratema masayateti lia Uruguay nunger defender, Gimenez-i tekolak agi iba goal ya tonglokja Egypt nunger mulung raksatsü.
Liverpool nungi football asayar mongin, Salah ya UEFA Champions League final nung Real Madrid den asayaba mapang tapubang yirua lir aser pai mezüng asaya nung shilem magi.
First half nung Paris Saint-Germain nungi striker, Edinson Cavani-ia maonga ana tashi angu, saka pai iba maongka magitet.
Maneni Luis Suarez-ia tangar asayartem dang nungi balakabo masayatet.
Egypt nungi Salah maliba ajanga Marwan Mohsen ya forward nung pa kisüng ama asaya, saka Uruguay nunger captain, Diego Godin-i kanga junga asayabayong, Mohsen-i goal kata magütsütet.
Rogonü arishi küm 26 ajungsang, Salah ya substitute tem den külemi menden nung mena aliba indang noksa ka stadium screen nung minute 30buba nung sayudang nüburtem ola tulu adoka pelatep, saka ba iba menden nung asaya temdaktsü.
Egypt nungertem ya 1990 sülenbo tang mezüngbua World Cup nung shilem agir.
Maneni Rogonü tanabuba asaya nung Morocco aser Iran na asaya aser……