FIFA World Cup 2026: France-i Morocco tsükdakja semi-finals tongogo

Foxborough, Chiteni/July 10 (Agencies): Brehostibarnü France captain Kylian Mbappe-i penalty ka meyoktet saka iba sülen goal tajung ka yokteta France-i minute trok tsüngta goal ana agütsü Morocco madak 2-0 agi takok ngua World Cup semi-finals tongogo.

Mbappe, shiba arishi küm 27 tain lir, pa World Cup asaya 20 nung asayar tanubutisang kumogo aser pai box telung nungi goal ka ya agütsüteta pa asoshi World Cup nung goal 20 buba yoktet aser minute trok lir Ousmane Dembele-ia goal ka yokteta semi-finals nung Belgium mesüra Spain den asayatsü jenjang alangzük.

Mbappe ya taküm iba asayamung nung goal timtiba agütsür tematiba jenjang nung Lionel Messi den külemi kasa goal ti agütsür lir, aser World Cup all-time scoring list nung pai goal ka agi dang Argentina nungba memenepi lir.

“Ibai tanen makai semi-finals asem asütsü. Ibai yimya ka ama kumogo, saka nü mapa ano meinyakma. Penalty metsüba nung Kylian dak kodanga temulung malemtsüsa meliasü,” ta France coach Didier Deschamps-i ashi.

“Ajisüaka onok kechi tongner, aji tongogo. Tanü onoki ano mera ka tejangleni agiogo aser final four nung ano maneni asayatsü,” ta Deschamps-i ashi, shibai asaya tatemlen Mbappe ya tetsüng temobu atsükba mechi melendakja liasü.

Iba asaya ya 2022 World Cup semi-final tanaben asayar ama liasü, kong France-i Morocco madak 2-0 agi takok ngua final atong. France tang tashi knockout matches asem nung goal kata machi lir, aser Morocco kanga meranga asaya saka Ismael Saibari yiruba mechi tapok adokba kanga jangja liasü aser minute 84 matong tashi target nung ball meyokteti liasü.

“Onok kanga tezü atanger, onoki takok ngunüa liasü. France ya team tajung aser asayar tajung lir ta agizüker. Goal agütsütsü maongka France-i tajungba angu. Onok tera anüalemer liasü aser iba tamakok agizüker,” ta Morocco coach Mohamed Ouahbi-i ashi.

“Tanü France tashi taitba liasü saka onoki tokteptet aser terenlok liasü aser küm pezü tsüngta parnok tsükdaktsütsü,” ta Ouahbi-i ashi. 2030 World Cup ya Morocco, Spain aser Portugal nung asayatsü.

France ya World Cup finals asem nung ashidena asayar linük asem buba akumtsü meranga asaya tetenzüklen nungi kanga junga asaya.

Mbappe ya France nunger World Cup matches timtiba nung asayar Hugo Lloris den sako kumogo, aser pai asaya tetenzüklen goal agütsütsü maongka angu saka Morocco keeper Yassine Bounou-i nokdangtet.

Minute 28 buba nung France-i penalty ka angu saka Mbappe-i metsüba Bounou-i ayong-ayonga soita ayu. Ibai Mbappe asoshi Euro 2020 sülen national team nung penalty miss asüba mezüngbuba alitsü.

Taküm iba asayamung akoktsü teimla aliba France nungi Lucas Digne-i first-half atongtsü anasa meta talang nungi metsüoktsüba crossbar nung tsükdaka liasü, aser Morocco nunger defensive asayaba ajanga French box tonga ball bener alutsü kanga tim atem aser first-half nung khen danga goal yoktsü memerang.

Mbappe-i penalty meyoktetba kepzüka minute 60 buba nung yoktet aser Morocco shia marudang Dembele-i ano goal ka yoktet.

Ibai Dembele asoshi taküm asayamung nung goal pongu buba alitsü.

“Ano talangka aotsü lir, aser tejakdang aliba ya tesashiba, saka onok junga arutsü,” ta Mbappe-i ashi.