FIFA World Cup nung Asia nungi telok teimba asayatsü temsüa lir

Kuala Lumpur January 11 (Agencies): FIFA World Cup nung 2026 nungi telok 48 asayatsü lemtetbaji Asia nung China nungi shir New Zealand tashi nung pela agizükogo. Asia nung aliba linüktem nungi World Cup nung team teimba asayatsü tetemsü, ta Asia nung football tiri ashi.
Sheikh Salman bin Ebrahim Al Khalifa-i ashiba agi, Asia linüktem tasazük aser senotsüren reprangdangra, tang tashi nung Asia nungi telok 4 dang asaya alibaji 8 tashi ajungket nung tali ajangzüktsü.
China nungi osang ajanga ashiba agi, telok talila bendenlokba ajanga parnoka World Cup nung meyipa arua asayatsü pungmang ataloktsü. Iba sentong ajanga maneni New Zealand pura tajangzüker rongnung adentsü imlar; “iba osangji kanga tajung.”
Iba sentong ajanga World Cup indang jenjang tamajungba akümtsü ta nisung aikati ashishir, saka Sheikh Salman Asian Football Confederation (AfC) tiri ashiba agi, iba temelenshi ajanga Asia football nung temelenshi tajung bener arutsütsü.
“Asia ya kanga dang continent tulu, aser senotsüren reprangdangra, tang aliba shilem dang nungi teimba lemzüktsütsü tetemsü. Asia nung football ya kanga nüngtuku, aser jenjang ajak nung kanga dang renlokdar,” ta paisa ashi.
Sheikh Salman ya FIFA Council nung tadong tir lir. Mongulbarnü parnok senden nung World Cup nung tokteptsüpur telok 32 nungi 48-i ajungkettsü telemtetba agi. Iba ya FIFA otsü nung telok teimtiba züngloksemba lir.
Telok teimba akümba sentong ya FIFA president Gianni Infantino-i pa election nung toktepdang tongtibangsa nangzükba onük ka lir. Pai yaküm iba jenjang atema toktepdang Sheikh Salman madak takok angu.
FIFA indang miim osang ka angazükba nung, telok 48 ajungketba ajanga Russia nung sen aatsü imla aliba dang nungi talila $640 million (605 million euros) aazüktsü imlar.