FIFA World Cup nung tang mezüngbuba English ref ka danga mali

Metsüremi 31, 2018 (Agencies): Taküm Russia World Cup nung British nunger referee kati danga shilem magitsü. Iba ya küm 80buba nung tang mezüng lir.
FIFA puri Yangtepnü referee 36 aser assistant referee 63 linük 46 nungi shimba sangdongogo, saka iba nung England, Wales, Scotland mesera Northern Ireland nungi kadanga densema maliasü.
United States nungi referee ana aser assistant ana ta shima parnok tajungba liasü.
Video assistant referees tang mezüngbuba World Cup nung amshitsüba lir aser parnok ya ketdangsertem rongnungi shimtsü.
England nunger referee Mark Clattenburg shiba 2016 European championship final nung regferee liasü pa mezüngbo FIFA indang list nung züngoksema liasü saka pa taoba season Premier League toktsür mapa ka atema Saudi Arabia-i oadok.
“Iba ya onok asoshi tezüdangtsüka lir kechiyong küm tem tsüngda international asayatem nung onok referee temi shilem agiba atema onok nema danga liasü,” ta Professional Game Match Officials Limited (PGMOL) tekolakba Mike Riley-i ashi.
“Mark Saudi Arabia-i aoba sülenbo tanga referee ka train asütsüba atema tetoktepba maliasü anungji English referee kati pa melentsüba maongka maliasü,” ta paisa ashi.
Howard Webb shiba South Africa nung 2010 World Cup final nung referee liasü, iba küm English referee rongnung pa kija liasü aser 2014 küm Brazil nunga pa kija liasü.
Taoba mapang nung English nunger referee asemi WC final nung referee süogo; parnok asem ya 1950 küm George Reader, 1954 küm William Ling aser 1974 küm Jack Taylor liasü.
Britain-i World Cup-i minister mesera royal family nungi züngsem shinga Russia-i meyoktsü, ta shiogo. Parnoki iba ita English yimti Salisbury nung taoba Russia nunger double agent ka chemical agi poison süa südaktsüba atema Russia aitsür.