FIFA World Cup Qualifier: Iran-i goal 3-0 agi India akok

Bangalore, September 08 (Agencies): Iran-i goal 3-0 agi India madak takok ngua 2018 FIFA World Cup qualifying asaya tanü Mongolbar nü asayaogo.
International sabang nung toktepa asayatsü maongka aiben manguba India teloki tanü kanga meranga asaya saka Asia ajunga nung temaba jenjang abenba Iran teloki tanü goal 3 tashi agüja India tsükdaktsü.
Tanü asaya tenzüker minute 29 buba nung Sardar Azmoun-i Iran asoshi mezüngbuba goal agütsü saka India defender, Arnab Mondal aser Sandesh Jhingan nati kanga junga asayaba yong asaya mezüngbuba shilem tembang tashi nung Iran nem goal agütsütsü maongka magütsüi süidaktsü.
Ajisüaka, asaya tanabuba shilem nung, asaya tenzüker minute 47 aser 51 buba na nung Andranik Teymourian aser Mehdi Taromi nati goal ka ka agütsüba yong par Iran-i tanü goal 3-0 agi India madak takok angu.
Alima tarensen nung 40 buba jenjang nung alir Iran-i tanü takok anguba ya densema asaya 3 nung takok anguba sülen points 7 ngua Group D nung temaba jenjang nguogo.
Oman aser Guam na den asayaba qualifying asaya nung tamakok anguba densema 155 buba jenjang abener India-i tan agi qualifying asaya 3 buba nung tamakok ajurur lir.
India-i par taruba World Cup qualifying asaya Turkmenistan den taruba October ita 8 nü asayatsü.