Fiji benjung nung yangji aliba India nunger choir-i shilem agi

Suva, August 22 (Agencies): Tan hopta Fiji, Methodist Arogo nung “Festival of Praising God with Hymns & Gifts” sentong akadang yangji aliba India nunger telok nungi choir temi tan mezüngsüa shilem agia liasü, ta media ajanga metetdaktsü.
Methodist Arogo, Fiji nung küm 50 dak tema dena aruaka India nunger telok nungi züngsemtem kodanga iba sentong nung shilem agitsü maongka mongui liasü.
Iba benjung nung Lautoka Wesley Circuit nung India nunger Reverend Abel Anand aser par choir temi “bhajana” telemsa tarensen nung ken tena liasü. Iba benjung ya August 15 nü nungi tenzük, ta Honibar nü Fiji Times osang ajanga metetdaktsü.
Methodist Arogo kübok telok tilala kümteta pei sasa acha ayanga aliba dang ‘circuit’ ta ajar.
“Onoki sarasademba langzüogo. Methodist Arogo telemsa 56 lir aser iba rongnungji onoka ka lir saka onok ya talangka mezüngoki aruogo. Iba sentong nung aniokba ajanga onok tamang tali ajungmesor,” ta Reverend Abel Anand-i ashi.
“Nüburtemi onok shilem agidang reprangba aser shilem agiba sülen onok tenüngsang anguba den külemi keyboard atemer George Low densemba ajanga onok tali tasü itdaktsü,” ta pai shisem.