Film kata menokdangtsüla:Konkona Sensharma

New Delhi, March 18 (Agencies) : Central Board of Film Certification (CBFC)-i “Lipstick Under My Burkha” film atema kuli kaket magütsüba ajanga actress Konkona Sensharma kanga mepelar.
Lai, CBFC-i kuliji odang agütsütsüla aser film kata menokdangtsüla, ta ashi.
“Iba amala film yabo nokdanger saka tanga film tembo menokdakba inyakyim agi ni joko laktetogo. Film ajak menokdangtsüla,” ta Konkona-i ashi.
“Lipstick Under My Burkha” film nung Ratna Pathak Shah-ia tongti shilem agia lir aser iba film ya jila ka nung aliba arishi küm balala India tsür pezü indang miim libaliro otsü lir.
Iba film ya tetsür kija dak rangloker yangluba lir ta aser film nung shi nung medemba yimya den maksütsü o aika jembia lir, ta censor board-i ashi.
Konkona-i, “CBFC-i kuli kaketji odang agütsütsüla. Film tapu ajak reprangtsüji asenok asoshi kanga tongtibang aser iba dak alaka tetsürtemi pei taküm atema jembiba film reprangtsüjia tongtibang,” ta shisem.
Konkona-i iba film otsü “March on Women” sentong nung jembia liasü. Iba sentong ya CNN-News18 nung Honibarnü yoktsü.
“Lipstick Under My Burkha” film agi yaküm Mumbai Film Festival mapang Gender Equality Sempet angu aser tawa-a Glasgow Film Festival nung Audience Award ngua lir.