Film nung shilem agitsü atema ni kodanga sen magir:SRK

Mumbai, April 16, 2016 : Bollywood nung joko küm metsü (20) shi shilem agia nüburtem peladaktsüsang, Bollywood superstar Shah Rukh Khan-i film nung shilem agitsü asoshi kodanga sen magir saka oset kar ajungkettsüba atemabo sen latettsür meshir ta ashi.
“Film nung shilem agiba atema ni kodanga sen magir. Ni oset advertise sütsüba, sentong ketdangsüba aser live show tem atema dang sen agir. Ni shilem agiba film tem ajanga box office nung sen temulung süa aatetdang producer tem dang parnoki mulungba agüjang ta ni ashir,” ta India TV nung yokba TV show “Aap Ki Adalat” nung Shah Rukh-i ashi.
“Ni acting aser film tem ya business ama magir. Film nung shilem agitetbajiang ni asoshi tuluba lir. Nüburtemi ni shilem agiba film tem sapua reprangba ajanga ni pelar aser tarutsü nunga ano nisung timbai kü film tem reprangtsü kü teimla lir. Iba den külemi nia khenübosa India nung film ka yanglutsü,” ta pai ashi.
“Ni iba tsütsü tangar linük den toktepnüba yimya ka lir…bendang lima nung tangar ni yangluba film ji repranger, iba film ya India nung yangluba lir ta ashitsü aser nia iba rongnungji adentsü jangrar,” ta pai shisem.
Nai küm 22 tejakdang TV show “Aap Ki Adalat” nung na megastar Amitabh Bachchan dang nungi actor tajungba ta ashi asü, ta ketdangser Rajat Sharma-i asüngdangdang pai, ibaji ni lanur asüdang ajak inyaktettsü amai bilema jembiba o lir, ta langzüa liasü.
“Küm 22 tejakdang actor tajungji kechi koma ka asüba agi akümer ni mejangjai liasü aser aji tangatetba nung anünga aliba ajanga lir. Ni tanur ka ama ajak inyaktettsü ama jembiba lir. Tang ni arishi küm 50 süaka khen khenbo tanur ama shisadanger aser jembishiner nung koda,” ta “Chennai Express” film nung shilem agisang SRK-i ashi.
SRK ya tan Hokolbarnü sayaba ‘Fan’ film nung asenoki angutsü. Iba film sayar mezüngnü sen crore 19.20 aatetogo.