Film nung shilem tajung ka angutsü kanga tasak: Swara

Mumbai, April 16 (Agencies): Swara Bhaskar-i ‘Tanu Weds Manu’ aser ‘Anaarkali Of Aarah’ nunger amala film nung kanga junga shilem agiba ajanga ajaki kanga sapua aküm. Aji saka lai ashiba agi, Bollywood nung ainer ka ama dang bilemer kechiyong iba industry nung kanga keraa tangar nem pei nüng jangjaa kümdaktsütsü ya kanga tasak lir.
“Iba industry nung takok angutsü ya ajak asoshi kanga melarabo masü. Ni anogo shia kü mapa nung timtem ajurur. Ya kanga dang tasak lir. Ni tang tashi ainer ka ama dang bilemer. Shilem tajung ka angutsü ya kanga tasak lir,” ta Swara-i ashi.
La jilushiba yimya ajaki temolung süa agizükaka Swara-i ashiba agi, ‘commercial’ tsütsüa takok angutsüji kanga tongtibang lir.
Swara-i shilem agiba taoba film ‘Nil Battey Sannata’ aser ‘Anaarkali Of Aarah’ na prongla ya tetsürtem dak ajemdaker yangluba film tem lir. Lai item amala film tem nung shilem agiba ya yimya ka masü saka iba ajanga India nunger film industry nung temelenshi tulu ka bener arutsüba angur.
“Tetsürtem dak ajemdaker yangluba film tem kanga renlokdar aser item film tem ya production company tulutemia inyakdar. Amitabh Bachchan nunger amala kanga dang nüngtugu actor-i ‘Pink’ aser ‘Piku’ nunger film amala nung shilem agir aser ano külen ni amala kati ‘Anaarkali of Aarah’ film nung shilem agir, iba ajanga yamala film ya yimya ka dang masü saka temelenshi ka adokba sayur,” ta laisa ashi.