Film star temia ‘Kabali’ film reprangtsü kanga jangrar

Actor Rajinikanth indang ‘Kabali’ film sayaba mapang cinema hall ka kima Rajinikanth sapurtem aika sendenba noksa nung angur.

Mumbai, July 22, 2016 : “Kabali” film ajanga nüburtem dang masü saka film star tem dena ajungmeso. Parnok ajaki superstar Rajinikanth-i tongti shilem agiba Tamil action drama film reprangtsü kanga jangrateper.
Film sayanü India film industry nung shilem agirtemi pei pei social media account nung film tenüng sangogo.
Iba film ya Pa. Ranjith-i direct asü aser film nung Rajinikanth-i Malaysia nung alir Tamil nungertem atema raratsüba angutsü.
Brihostibar aonung iba film ya Malaysia aser Singapore na nung sayuba sülen Dubai aser US tesem kar nung sayuogo. Iba den külemi July 29, 2016 nung iba film Malayasia oshi nunga sayatsü.
“Kabali” ya Tamil oshi nung dang masü saka Hindi aser Telugu oshitem nunga yanglua lir.
Celebrity S.S. Rajamouli, Madhur Bhandarkar, Kunal Kohli aser Dhanush nungeri Twitter ajanga Rajinikant tushiogo aser ano karibo mapa agi mapang madokba ajanga iba film mezüngnü mezüng sayuba mapang mereprangtetba atema kanga sasaba lemsatepogo.
Indian film industry nung shilem agirtemi iba film Twitter ajanga tushiba kar yamai lemsateper:-
S. S. Rajamouli : Iba film sayanü mezüng sayuba mapang mereprangtetba atema kanga sasar.
Madhur Bhandarkar : Aurora Theatre, Matunga nung iba film mezüng sayuba reprangtsü aoer aser yangji Rajinikanth sapurtem den film longsetepa reprangtsü jangraseter.
Priya Anand : Film tangokba tesem nung tezüdanga amunger kechiba süra ‘Kabali’ film reprangtsü mapang mongutet. Nenok Twitter nung pelatepba agi nibo jangra matemer.
Kunal Kohli : Tanü ya ‘Kabali’ anogo. Rajnikant ya nisungji ka lir. Pa film sayatsü atema sodi anogo atatsü tenüngdaktsü madoker, saka pai shilem agiba film sayadangnübo sodi anogo ka amai dang kümadoker.
Kamaal R. Khan : ‘Kabali’ film ya jungrara. Ibai tasü tait film ka lir. Tetushi ajak Rajnikant nem agütsür.
Dhanush : Chuba arudar, anungji lenmang sadema lapokjang. Tang ya pelateptsü mapang lir. Mezüngnü mezüng sayuba reprangtsü.