Film tem ajanga nüburtem nem tesayuba balala agütsütettsü: Sushant

New Delhi, August 5 (Agencies): Hokolbarnü Sushant Singh Rajput-i ashiba agi, film tem ya nüburtem nem tangazükba balala agütsütsü asoshi hadir tajungka lir.
Sushant ya NDTV aser DHFL Pramerica Life Insurance Co Ltd’s Behtar India campaign indang ambassador lir aser pa Delhi nung Vasant Vihar nung aliba Modern School nung sentong ka nung shilem agia liasü. Iba sentong nung pai tzü mopung dak sendakba nung tibilemtsü tem dak tali rangloker inyaktsü asoshi lemsatepa liasü.
Pai ashiba agi, film yangluba loktii tzü mopung dak ajemdaker movie tem yanglutsüla.
“Tongtibang osang ka nüburtemi minute 10 nungi 15 tashi bilemdangerbo amadoker, saka film tem ajanga otsü tajung ka yanglur shiteter aser ibaji mapang talangka atema mamadoker,” ta Sushant-i ashi.
“Asenoki movie tem amshia otsü aika shitettsü aser item rongnung tzü mopung dak sendakba tebilemtsütem inoka shitettsü,” ta pai shisem.
Behtar India Students’ Conclave nung jembidang Sushant-i pa lanuwa otsü ashi. Pai ashiba agi pa kanga dang samaro liasü.
“Ni school aser college ajak Delhi nung azüng. Tetenzükdangbo ni nüngtugu nisungtem sülen tsüngsanga liasü. Ni Shah Rukh Khan sapur ka lir. School azüngba mapang ni pa indang autograph meshitsü asoshi Swades-i ao saka tia maka ni mongutet. Iba sülen küm ishika lir külen ni pa sülen tsüngsanga liasü aser küm ishika lir pa ket nungi best debut award agizüka liasü,” ta Sushant-i ashi, shiba Kai Po Che aser M.S. Dhoni: The Untold Story film nunger nung shilem agiba atema ajaki jangjaa aküm.
“Ni lanuwa class nung temaba mesera tanabuba jenjang nungbosa adoktsü asoshi ajungshi aser iba ajanga sen aser tetushi angutsü, ta ashi, saka ni ashitsü agibo nisungtemi pei jangraba inyaktsüla,” ta pai shisem.
Taruba project indang jembidang Sushant-i ashiba agi: “Ni tang ‘Chanda Mama Door Ke’ nung shilem tagidak lir aser iba atema tawa NASA-i or aruogo. Ni iba film nung astronaut ka ama shilem agir,” ta paisa maneni shisem.