Film tem tanaben meyanglushitsüla: R Balki

April 23, 2016 : Film yanglur R Balki-i film yanglushiba yimya ya majung ta ashi.
Pai yangluba film tem tanga oshi nung yanglushiba dak sentakba nung pai, “Film kaji kodanga tanaben meyanglushitsüla kechiba süra nisung kari yangluatoker aliba film yanglushitsü nüngdak madoker. Otsüji nisung ajaki yanglutettsü ta nibo bilemer—tesüiba mapang matalokba kar bilemdangdang kü dangi otsü yanglutsü tejangraba arur,” ta interview ka nung ashi.
Ni yangluba film agi sen crore100 mesüra 200 aatsü bilema mesüra ‘Airlift’ aser taküm otsü nung ajemdaker yanglua aliba  ‘Neerja’ film tem ama yanglutsü ni bilema mali, ajisüaka kü mulungjang ajungmesoba otsütem ni zülur, ta Balki-i ashi.
‘Cheeni Kum’, ‘Paa’ aser ‘Shamitabh’ film tem yanglusang, Balki-i, ni film reprangtsü kanga jangra liasü aser computer engineering agiba mapanga ni film kanga reprang, ta teti ashir.
Pa kinungtsü aser film director, Gauri Shinde-ia pa tebilemba den saku kar lemsatepogo.
Balki-i, “Onok taküm ya film ama dang lir, onoki film repranger, film otsü jembir, film atema rarateper aser film zülur. Film otsü dak alaka tanga otsübo mejembiner,” ta ashi.
R Balki-i, nibo film yanglushidang tangar ka tebilemba aser nükjidong mataloktsütettsü amai bilemer, ta ashi.
“Ni züluba film ang ni direct asür. Tangari züluba otsü ka parnoki aginüba ama ni direct mesütettsü kechiba süra otsü züludang bilemba aser nükjidong ayuba ataloktsü atema pei züluba pei direct asüba tajungba. Tangar nükjidong ni ajak mataloktsütettsü,” ta pai ashi.
Pai tang tesüsa yangluba  ‘Ki & Ka’ film April 1, 2016 nü sayaogo.