Film yanglur Wes Craven arishi küm 76 nung süogo

Spike TV's 'SCREAM 2010" - ArrivalsAugust 31, 2015: Kanga dang nüngtugu Horror film director, Wes Craven tekolok cancer agi timtema lir arishi küm 76 nung iba lima toktsüogo, ta par kinüngertemi metetdaktsü.

Pa akümlidang küm 40 tashi film yangluba mapa inyaka liasü aser pai yangluba ‘A Nightmare on Elm Street’ aser ‘Scream’ horror film tem ya tang tashi tejen makümer.

Wes Carven ya Los Angeles nung Deobar nikongdang par kidang asü aser pa asüba mapang kinünger ajak liasü. Pa tekolok cancer agi shiranga lir külen iba lima nungi pilaogo. Onok temulung nung pa asüba atema kanga nemjema iba tejashi osang ajak den lemsateper, ta par kinüngertemi sangdong ka ajanga metetdaktsü.

Craven küm asem tashi tashidak agi amener liaka film mapa maneni inyaka liasü. Pai yanglua aliba film tasenbaji ‘The Girl in the Photographs’ lir aser iba film ya tan ita 2015 Toronto Film Festival mapang sayatsü sentong lir. Iba den külemi pa MTV indang ‘Scream’ tv series nunga inyaka liasü.

Pai film yangluba mapa 1972 küm mezüng tenzük aser iba mapang pai ‘The Last House on the Left’ film yanglu. Iba sülen 1977 küm ‘The Hills Have Eyes’ film yanglu. Ajisüaka 1984 küm ‘A Nightmare on Elm Street’ film yangluba nungi ang nübur ajaki meteta aküm aser iba film yangludang US sen million 2 intok saka box office nung iba film ajanga US sen million 25 aazüktet.

1996 küma pai yangluba ‘Scream’ film ajanga box office anokshija liasü. Iba film nung Neve Campbell, Courteney Cox David Arquette aser Drew Barrymore nungeri tongti shilem agi aser US sen million 173 aateta liasü.

‘Scream’ film nung tongti shilem agir rongnung, Courteney Cox-i, “Tanü alima nung tongtibang nisüng ka samaogo, shiba kü tembar aser len tuyur ka liasü. Iba tejashi anogo nung ni par kibong den lir,” ta twitter ajanga Wes Craven nem akhüm tsübu agüja lemsatepogo.

Ano kasa film nung shilem agir ka, Actress Rose McGowan-ia, “Ni nüktzü ayimer, kanga tongtibang nisung ka iba lima nungi pilaogo,” ta temulung shiranga lemsatepogo.

You must be logged in to post a comment Login