Finance Dept-i yazü kuli magütsütsüla: ACAUT

Kohima, August 17 (TYO): Mon-Tizit Road nung ayong nung ‘Golden Bridge’ indang Finance Department-i ACAUT nem telangzüba agütsüba dak sendakba nung ACAUT-i, Finance Department-i tagidak maka kuli magütsütsüla saka süoki ia agitsüla, ta metetdaktsü.
Finance OSD ajanga ashiba agi, April 17 nü mezüngbuba drawal authority letter ji April 20, 2017 nü tashi tagila liasü, saka süidaktsüba ajanga sen lakh 2854.97 ji magizüktet, aser ibaji ajanga ano May ita nung kasa drawal letter ka issue asütsüsa akum, ta metetdaktsü. Iba dak sendakba nung ACAUT-i, mezüngyongi sen magizükba indang kuli OSD-i agütsütsüla; OSD-i pa tajemdakdak kuli makai yimjak nung mejembitsüla; anungji jurila luden kati dang iba kuli ya bushisüngdangtsüla, ta ACAUT Nagaland Media Cell-i tanü sangdong ka ajanga metetdaktsü.
Non-Developmental heads kübok senotsü indokba dak sendakba nung ACAUT Nagaland-i, “Finance Department-i o yanglua nüburtem dang yazü jembir. Onoki tamalen sangdongba ama, Non-Developmental heads kübok sen anaben agizükba nung crore 57 ser lakh 9 agizükogo; ajisüaka E.E. Dimapur Division kübok apu ka yanglutsü atema tawa, May 3, 2017 nü agizükba sen lakh 2447.17 ji State Plan kübok lir. Ano Mon-Tizit lenmang nung Tikang ayong nung apu yanglutsü atema October, 20,2016 nü agizükba sen crore 12.52 ji Non-Plan kübok lir. Anungji, Central sorkari State Plan aser Non Plan telemsa kübok sen indokba inyakyim toktsür süra, kechiba State Plan aser Non-Plan ta lemsar? Iba ya tanga kecha masü saka yazü jembiba aser ashioktsüba ka lir,” ta metetdaktsü.
Finance Department-isa Non-Developmental funding ji NEC, NLCPR asü additional grant kübokar mashi, ta sangdong nungsa shia lir.
“PWD (R&B)-i sen lakh 2854.97 ji EE PWD (R&B) South Division, Kohima tenüng nung agizük, aser Mon-i yok. Mezüngyongi senji E.E. PWD (R&B), Mon tenüng nung agizüktettsü koka liasü, süra kechiba senji Kohima nungi agizüker ang Mon-i yok?” ta ACAUT-i asüngdang.
Maneni PWD-i “City Tower nungi DC Court Junction tashi” project mapa atema sen crore 20 indang shia lir, ajisüaka atangji nung yangi lenmang mali, ta ACAUT-i ashi.
“OSD, Finance Department-i pai tenzükertem indang meteta alitsüla, kechiyong Finance Department indang tenüngji tanemtanemi “5% Commission Department” nungi “30% Commission Department” kümogo ta nüburtemi meteta lir. Election agitsü mapang tongdar, anungji iba tenüngji ano “50% Commission Department” ta aküm nunga nüburtemi mesüngmangtsü,” ta ACAUT-isa metetdaktsü.