Finance minister dang MGNREGA senotsü lemzüktsütsü akhang

Jaipur, May 25 (Agencies): Activist telok kati shidi ka ajanga Union finance minister, Arun Jaitley aser rural development minister, Chaudhary Birender Singh na dang, MGNREGS (Mahatma Gandhi Rural Employment Guarantee Scheme) junga benoktsü atema Supreme Court (SC)-i tuyuba ama inyaktsüla, ta khangogo.

May 23 nü züluba shidi nung activist tem jagi May 13 nü SC-i sorkar dang mapang shidak nung minimum wage agütsütsü aser taa menoa magütsüba atema temenok agütsütsü tuyuba shisema lir.

May 13 nü SC-i Centre sorkar dang state tem nem MNREGA scheme kübok tagütsütsü aliba senotsü ajak agüjang ta tuyuba den külemi tzünglu maruba ajanga timtem ajangshia aliba aluyimertem nem magütsüi aliba taa agüjang, ta tuyua liasü.

“Financial year 2015-16 nung sen crore 12,000 dak tema magütsüi alibaji mamangtettsüka lir,” ta shidi nung shia lir.

SC tetuyuba nung ajemdaker shidi nungji, “Mapang shitak nung aayangertem nem sen agütsütettsü atema state sorkartem nem iba scheme kübok senotsü peria agütsütsü atema India sorkar dang tuyuogo,” ta shia lir.

Iba dak sentakba nung activist temi finance minister dang, iba scheme junga benoka inyaktettsü atema MGNREGS asoshi sen crore  17,000 agüjang aser 2016-17 küm atema mezüngbuba shilem agütsütsüla ta ashi.

Parnokisa Centre dang tzünglu maruba ajanga timtem agi kongshiba state tem nung MGNREGS kübok anogo 150 nü aayangtsü atema sangdongang, ta mepishi.

“Iba scheme kübok anogo 15 dak tema taa menotsüba atema sorkari temenok agütsütsüla. Aayanger shia nem tajemba agi state indang minimum wage agütsütsü atema tetuyuba tesen agütsütsüla,” ta shidi nung shia lir.

Iba shidi nung sign süa alir rongnung taoba mpang civil servant- Aruna Roy aser Harsh Mander na, JNU economist Jayati Ghosh aser Delhi University professor, Dipa Sinha nunger densema lir.