Fit India Campaign nung Meghalaya nungi police ketdangser ka shim

Shillong, August 28 (Agencies): Fit India – Healthy India Campaign nung Icon ka asütsü atema Meghalaya nung mapa nungi anisüngzüker aliba police ketdangser Eugene K Marak shimogo.
Iba sentong ya asüng Prime Minister, Narendra Modi-i Indira Gandhi Stadium, New Delhi nung tenzüktsütsü.
Fit India – Healthy India Campaign atema Icon 27 shimba rongnung Eugene K Marak dena lir.
Eugene ya 5 Dan Black Belt international Taekwondo player ka lir aser pai Taekwondo Championship aika nung linük atema shilem agiogo. 12th South Asian Games 2016 den tanga international tetoktep aika nung pai Referee ka ama shilem agiogo.
Arishi küm 64 tain Eugene ya October 30, 1955 nü Kharkutta, North Garo Hills nung aso. 1986 küm pa Meghalaya police nung Sub-Inspector ka ama shim aser 2011 küm Dy. SP jenjang atong.
Pai police mapa inyakdang mapa tajung inyakba atema award 60 dak tema agizükogo aser October 31, 2013 nü pa mapa nungi sodi angu.
Pai mapa nungi anisüngzükba sülen saisapongba nung temulung agütsü aser tetoktepba aika nung shilem agia liasü.
Taküm pa nem Kiang Nangbah Award (State Award) for Sports agütsü aser tang ya pa Meghalaya Taekwondo Association nunga Vice President teinyakdak lir.
“Meghalayan ka asüba atema ni kanga nüma atanger. Ni kechi inyaktsü jangrar ibaji maneni inyaktsü. Iba jenjang tongtetba atema Tsüngrem nem tenüngsang agütsür aser ajak dang pelaba metetdaktsür. Talisa, Meghalaya Taekwondo Association, Meghalaya Sports Dept aser Director Sports Authority of India dang pelaba shisemer” ta Eugene-i osangbener den jembidang ashi.
“Kü dang Taekwondo sayusang Master Luthre Lohar ni mamaer aser pa dang kanga pelar” ta paisa shisem.