Fit India Movement state nung mungogo

Dimapur, Luroi/August 29 (TYO): Linük ajunga den jangyu medema Longleng district nunga Fit India Movement amenokba sentong NIC hall Deputy Commissioner Office Longleng nung agiogo. Iba sentong nung District Administration ketdangser aser staff tem, GB, Town council aser Longleng district kübok Departments ajak nungi ketdangsertem dena liasü. Maneni iba sentong ya school, college aser kiyong balala nung ayongzüka mungogo. Sentong nung shilem agirtem ajaki fitness dak sendakba nung tenangzüktepba agia liasü.
Ato Kilonser Narendra Modi-i “The Fit India Movement” ya Indira Gandhi stadium, New Delhi nung August 29 nü National Sports Day amungba mapang amenoktsüogo. Iba anogo ya asayar Major Dhyan Chand asoba anogo lir, shibai pa fitness, Stamina aser Hockey Stick ajanga alima ajaunga süngmangdakja liasü.
Iba sentong ya India ajunga nung Doordashan ajanga sayuogo aser fitness dak sendakba nung tenangzüktepba urban local bodies ajak nung agiogo.Iba sentong ya Mon Town Council Office, Conference Hall nunga 10:00 ako nung live sayua liasü. ADC Mon aser Administrator, Mon Town Council, Hiazu Meru aser Mon Town kübok ward 11 prongla nungi tirtem iba sentong nung dena liasü.
Tang mezüngbuba fitness movement ya amenokogo, koba nüburtem anogo shia libaliro nung temang arakzüa inyaksangshiba maparen nung shilem agidaktsütsü nükjidong nung amenok. Ato Kilonser-i ashiba agi, saisapong ya fitness dak indang indanga sendaka lir aser fitness ya ojang ka dang masü saka temang anema yimjiyimjung nung alitsü atema tenüngdakba maparen ka lir. Fitness ya lokti ajak ayimjema shilem agidaktsütsü nüngdaker ta shi PM-i ashiba agi, libaliro majungba ajanga tashidak bendenlokba ya libaliro melenshiba ajanga aneptsütettsü.
PM-isa nüburtem dang Fit India Campaign tejakleni bener aotsü mepishiba den tarutsü tajung ka asoshi iba sentong ayongzüka agitsü ya kanga tongtibang ta ashi. Paisa, takok aser fitness na sendaktepa lir aser takok tajung nguyonga aoba nisungtem timba ka kanga fit lir, ta ashi.