Florida nung school ka nung nisung 17 khaset

Washington, Tsüklai 15 (Agencies): Taoba mapang zünga alir kaketshir kati Florida high school ka nung Rasemnü AR-15 rifle bener arua injang khaloktsüba lendong nung nisung 17 khaset. Ajungbena iba ama lendong tulu adokba ajanga iba kaket reju nung azüngertemi atsüker pei tsürabur aser adianutem dang teyari meshia text zülua liasü. Iba lendong agütsüsang ya arishi küm 19 tain, Nikolas Cruz lir aser pa ya Parkland nung aliba Majority Stoneman Douglas High School nung zünga liasü saka yimya tamajung amshiba ajanga iba kaket reju nungi aridoker liasü, ta Broward County Sheriff, Scott Israel-i ashi.
Iba sülen Cruz ya timtem kecha majurui anasa aliba Coral Springs jila nung apu aser yiruba zübu kar aliba ajanga mozükidangi anir ao,” ta ketdangseri ashi. “Onoki pa indang website aser social media balala bushisüngdangba mapang lir aser item ya karbo kanga tetsübutsüka lir,” ta Israel-i ashi.
Iba lendong nung yirur ya tejangjabo memetet saka nisung 14 shi mozükidangi bener ao aser ana bo iba lendong nung yiruba zübu ajanga asü, ta Israel-i ashi.
US Tir, Donald Trump-ia iba lendong aitsüogo aser iba den külemi lendong ajurua alirtem den tejashi aser asükhu lemsatepogo.
Rasemnü iba lendong atalokba ajanga United States nung prangbong amshia lendong balala agütsüba maneni asendenshir aser iba linük nung küm shia iba ama lendong nungi nisung 33,000 jungnüa taküm samar.
Iba lendong nung asürtem rongnung iba kaket reju indang football team nung assistant coach aser security guard, Aaron Feis densema lir. Pa ya injang khaloktsüba nungi kaketshirtem kümzüktsü mechi kaketshirtem jakdang oa nokdak aser iba mapang khaset, ta ashir.