Floyd Mayweather den tsüngteptsü Khabib-i jazük

Los Angeles, Mongputeni/October 15 (Agencies): Mixed martial arts asayar Khabib Nurmagomedov-i Conor McGregor jilu benshia boxer Floyd Mayweather jazükogo.
Mayweather indang promoter Leonard Ellerbe-i Instagram nung video ka post asüba nung Nurmagomedov-i Mayweather jazükba nguogo. Ellerbe aser Nurmagomedov na Russia nung ajurutepa liasü.
“Floyd ana tang asayatsü nüngdaker. 50-0 versus 27-0. Ana ya tamakok manguba asayar ana lir. Arem nung chuba ka dang lir. Küna rongnung ni chuba lir kechiyong pai McGregor longdaka matsüng saka ni pa mela mela tsükdaktsüogo. Let’s go,” ta Nurmagomedov-i video nung shia aliba angutsü.
Ajisüaka Nurmagomedov-i boxing asü UFC yimya nung asayanera ajibo mashi. McGregor ama Russia nungba yaa taoba mapang professional boxer ka ama tajangshiba kecha mali.
Taoba küm Mayweather den asayaba ajanga McGregor million aika aazük.
Taoba hopta Nurmagomedov-i McGregor akokba sülen UFC lightweight crown tanaben meyiba agiogo.
Asaya tembangba sülen pa Octagon nungi jokteta tugur McGregor den yariteper ka den raratep, shibai pa mesüshia liasü. Kasa mapang nung Nurmagomedov indang team nungi züngsem kari McGregor daka tsünga liasü.