FlyDubai-i tayimtsü tsükokdang asür shia nem sen $20,000 agütsür

Dubai, March 20 (Agencies) : Deobarnü Dubai nung FlyDubai company-i ashiba agi, tan Dubai nungi Russia aoba tayimtsü tsükok dang asürtem ajak nem sen dollar 20,000 agütsütsü.
Taoba Honibarnü tayimtsü tsükokba lendong nung asürtem jangjatsü aser item kinungertem den tongtepratepa tang rongdak nung amshidaktsütsü mechi iba teyari mapa inyaktsü lemtet, ta airline sandong ka ajanga ashiba Xinhua news agencies-i metetdakdaktsü.
“FlyDubai-i iba lendong atalokdang tayimtsü nung mena alir nisung shia nem tang nüngdakba kar peridaktsütsü atema parnok nem sen dollar 20,000 agütsütsü lemtetogo, ta kasa sangdong ajanga ashi.
“Onoki iba lendong atalokba ya koma sür atalok ibaji kanga arok ia bushisüngdangtsü. Iba den külemi asür aser tayimtsü anir kinüngertem ajak den asüko lemsateper,” ta taoba Honibarnü CEO Ghaith Al-Ghaith-i metetdaktsü.
Iba tayimtsü nung tanur pezü dena parnok nisung 55 den tayimtsü anir aser acha ayanger parnok tenet liasü. Parnok 55 rongnung nisung 44 Russia nunger, 8 Ukraine nungi, ana India nungi aser ka Uzbekistan nungi liasü.
Iba tayimtsü ya 2011 küm yangluba Boeing 737-800 lir aser iba tayimtsü anisang ya tayimtsü anishitsü tenzüker tang tashi nung gondha 5,965 tayimtsü anidangba nisung ka lir. Pa den yaritepsangjia tayimtsü gondha 5,769 anidangba nisung ka lir, ta Al-Ghaith-i ashi.
Iba lendong koma sür atalokar ibaji tang bushisüngdang tesüdak lir.