FlyDubai tayimtsü tsükok: India nunger ana dena nisung 62 asü

New Delhi/Moscow, March 19 (Agencies): Honibarnü Russia nung FlyDubai tayimtsü tsükokba lendong nung asür nisung 62 rongnung India nungera nisung ana densema lir.
Tayimtsü lendong nung asürtem osang tejangja agütsüdang Dubai Media Office indang official Twitter handle ajanga, asürtem rongnung Russia nung 44, Ukraine nungi 8 aser Uzbekistan nungi nisung ka liasü, ta metetdaktsü.
Tayimtsü nung passenger 62 pronglaji Dubai nungi Russia-i aoba mapang iba tayimtsüji  Rostov-on-Don airport nung tanabenbuba anentsü merangdang tsükok.
Russia nunger emergency ministry-i ashiba agi, Boeing 737-800 tayimtsüji Dubai nung aliba budget carrier Flydubai-i achaayanger aser iba tayimtsüji anepdang 03:50 ako (00:30 GMT) nung tsükok.
“Iba tayimtsüji ali nung tsükoka tila küma ajasa. Mezüng bushishisüngdangba ajanga tayimtsü nungji passenger 55 aser tayimtsü ketdangser nisung 7 liasü. Parnok ajak asü ta bushitetogo,” ta Investigative Committee of Russia-i sangdong ka ajanga metetdaktsü.
“Tanabenbuba anentsü merangdang tayimtsü tashikangji ali nung atsükba sülen mi adok,” ta Rostov region emergency ministry-i ashi.
Region Angh, Vasily Golubev-i, tayimtsü tsükokbaji Rostov tesem nung mopung sashia aonba ajanga liasü ta ashi, ajisüaka Russian transport minister atema adviser, Zhanna Terekohova-ibo, pilot-i aibelenba-a kuli rongnung ka asütsü, ta shiogo.
Tayimtsüji ‘runaway’ atongtsü metre 250 shi lia airport telungtet nung tsükok.
Rostov’er emergency ministry nungi ketdangser kati, tang tashi flight recorders mangu ta ashi.
Flydubai-i sangdong ka ajanga, “Onoki tekaraba nung osang bendentsü merangdar. Iba tayimtsü nung alir passenger aser crew tem atema sarasademtsür. Iba lendong ajanga  takoksa angurtem ajak yaritsü atema onoki inyaktsü,” ta ashi.