FNR aser DAN

2003 küm nungi tenzüka Nagaland nung Democractic Alliance of Nagaland (DAN) sorkari yimsüsüa arudang, Naga nunger asoshi aser talisa DAN sorkar asoshi Tsüngremi moatsüba telokji Forum for Naga Reconciliation (FNR) tleok ya liasü. Iba telok yagi sorkar nükenbelemtsüba mapa ajak parnoki aben aser sorkari mekoktettsüba mapa ajak kokteta Nagaland-i yimjung bener aru. Aji oda, FNR aliba ajanga DAN sorkar meteta aser memeteti timtem aika nungi jenbuogo aser kanga ayongogo ta bilemer. Ibaji küm ter jakdang Nagaland aser temeket nung Naga nunger yimten nüchiso bushirtem rongnung telok aika küma lemsar tsükchitepba tensa tia angur aser ajangshirtemi metettsü. Iba mapang anüngdanga kong kechi ataloktsüar memetetba agi kima yimdongi aotsüa kanga athidaka liasü. Aji oda, Naga nunger yimten nüchiso bushiba maparen nung yiar ama küma tesüiba küm aika Naga nunger o Naga nunger na tsüngda azütokshitepa liasü. Iba mapang yimten, lokti aser arogotem tenüng nung lenir aikati yimjung yanglutsütsü meranger saka makoker ta aliba mapang ka arogo nung lenirtemi anir FNR telok tentet aser parnoki Naga nunger nüchiso bushirtem rongnung adianu agi tsükchir kümer injang bomb amshia raraa alidak tiyongi ir bendangtsü aser yimjung yanglutsü. Iba anogo nung jagi tenzüker Naga nunger linük tenzükertem rongnung tsükchitep anen aser külemi senden ka nung ajurutepa yimjung nung yimten ken o külemi jembitsü indang dena ken o benoka jembitet. Ibaji FNR asoshi takok aser Naga nunger ajak asoshi taochi aser temoatsü tuluka liasü. Iba mapang sorkar nung alirtemi Naga yimten ken o jembiba ya shitak jembia odar ta metetdaktsüba dak alaka tanga o kecha mali asü. Aji oda, Nagaland nung yimsüsürtembo akok tashi sen bushitsü aser election-i aitsü aser ano sen bushitsü aser ano election nung tokteptsü ta asüba dak alaka Naga yimten tebilemtsü ya tatembang küma telatetba kati arutsü asoshi bilemba aser inyakbabo kangabo mangu. Iba ama tensa tia ka nung FNR teloki lendong timtem tulu tizükteta Naga yimten ajungtsü asoshi inyaka aruogo. Tang  tashi nung DAN sorkari Naga yimten tebilemtsü akoktsü asoshi tongtepratep mapa nung yariteptsüba dak alaka tongti shilem agitsübo nangzüka mali, anungji tang tashi atsü tezülen nungi dang repranga atar. Ajisüaka, tang Naga nunger yimten lenirtem temulung nung Naga yimten tebilemtsü latettsü asoshi shisaboluba dang nungibo taruba election asoshi shisa tebuluba buluba reprangtetter. Tetezü, taruba election  tashi Naga yimten tebilemtsü ya melatetteti alitsü parnoki imlar südi. Iba ama mapang ka nung, Naga yimten tebilemtsü tatem küma latettsü asoshi FNR telok dang shilem agidaktsünüa mepishiba maparen nungji tang DAN sorkar nung alir yimsüsürtemia koba tashika shilem agitettsü ta asübaji tongtibang asütsü. Naga yimten yaktasa tatembang küma latettsü asoshi külen FNR telok dang shilem agitsü mepishir, ano külen NSCN-IM telok o India sorkar na tsüngda 3rd August nung renemba ken o nunga puküma nokdaker aser ano külen shitakba nungbo taruba election asoshi terenlok mapa kecha meinyaki sen sen bushilen sensür ta süra Naga limai ano atakatem jakzür asütsü. Iba atakatemji arura, ano Naga nunger o Naga nunger na Naga nunger yimti yimdong nung kateptsü, yimten yimsüsürtem pei kidang nungi mapai aotsü tsübutsü, tatar senden nung senden melitettsü, Nagaland nung office aser business mapa  shitak meinyaktettsü. Aji oda, Naga lima ano tetsübu agi asüngtsü. Idangjibo asen lima nung tangar dang temelaba meshir senzütsüsa akümtsü. Iba ama tensa tia ka nung asenok malitsüsa, yimten yimsüsürtem mulung merüka alitsüla, aser parnok mulung nung yimten aser nübortem asoshi khuretsa bilemtsüla. Sen bushili election-i ili, sen bushili election-i ili ta asübaji jangratemtsükabo masü. Ibaji tazüngla aser maksü nung atemtsü. Iba jagi tanü nübortem okronger aser asünga okrongtsü. Aji oda, ajaki shilem agia Naga yimten tebilemtsü ya koker külen, sen agi masü tangatetba agi electioni aitsü aser adoktsü aser nübortem den külem ser Nagaland ya alima nung topur tajungtiba lima ka asütsüsa yanglutsübaji Naga nunger ajak mangdang, tejangraba aser nükjidong asütsüla.