FNR aser NPMHR-i aitsür; Myanmar nung Naga nunger asoshi bilemtsür

Dimapur, May 22 (TYO): May 21 nü Tirap district nung Khonsa West Assembly nung MLA Tirong Aboh, par jabaso aser nisung 9 tepsetba khukhua aitsür, ta Forum for Naga Reconciliation (FNR)-i metetdaktsü.
Iba lendong nung taküm samaba kibong ajak den FNR-i asükhu lemsateper.
Tashiyim mapa inyakba ya shisamakaba tangatetba lir aser tanü alima nung iba ya magizüker. Iba ama tetsübu, terata aser kechi ataloktsü’ar memetetba tensa ka ajuruba atema süoki ia bilemer. Olemtep aliba ajanga obang meputep aliba angatetteptsü onoki ayongzüker, ta FNR-isa ashi.
Naga Peoples Movement for Human Rights (NPMHR)-ia tanga sangdong ka nung MLA Tirong Aboh den nisung 11 khasetba atema aoksar ta metetdaktsü.
May 16 nungi Naga Self Administered Zones kübok Hoyat, Throilu aser Nyanching yimtsüngtem nung Burmese Military-i Naga nunger anema mapa inyakba mapang ka nung iba lendong atalokogo, ta parnoki ashi.
Nübortem tangatetba balala nung ajemdaker lemsar liaka aser kija mesüra lennirtem tsüngda obang meputepaka, nisung tepsettepba ajanga telangzüba mangutsü. Iba ya meimchir temeten alema lir, ta NPMHR-i ashi.
MLA Tirong Aboh dak kechi metokmeperi mesüra aibelena aliba agi tepset’ar memetet saka pa den par jabaso aser nisung 9 tepsetba khukhua aitsür. Parnok tanülatem anisüngzük ngudakjangmja, ta NPMHR-isa metetdaktsü.
Maneni, Burma nung sepaitemi Naga nunger reshikangshiba aitsür. May 16 nungi tenzüker Burmese military aser Indian Military-i Naga lennirtem aser yimdaklirtem aika puogo. Yashi Indian army-i Hoyat yimdaklir 20 apuba osang angazüker. Parnok ya jangotsü alir Monyakshu nungi meyipa aodang apu.
Burma aser India sorkartemi Naga lennirtem aser yimdaklirtem ajak chioktsü atema onoki ayongzüker. India nung teloktem aser United Nations-i anir international communities-ia iba mapa aitsütsüla ta NPMHR-isa metetdaktsü.