‘Folklore of Eastern Nagaland’ kaket saya

Kohima, Aenjeti 30 (TYO): ‘Folklore of Eastern Nagaland’ ta ser Department of Underdeveloped Areas (DUDA)-i adokba kaket ka tanü Nagaland Chief Secretary Pankaj Kumar-i sayatsüogo.
Hotel Vivor, Kohima nung sentong ka nung Pankaj Kumar-i iba kaket sayatsü. Iba kaket nung Eastern Nagaland nungi kin 6 (Chang, Konyak, Phom, Sangtam, Yimchunger & Khaimniungan) indang sangro, ken, otsü aser taküm indang zülua lir.
Kaketji Anungla Longkumer DUDA-i bendena meyipzük, Temsula Ao-i yanglushi aser Vineizotuo Z Tase o Vithuse Temi nati noksatem bendenlok.
Nagaland nung kin aika lir aser iba jagi Nagaland ya khenyongi balaka aser jangratemtsüka lir, ta Chief Secretary, Pankaj Kumar-i kaket sayatsüdang ashi.
Paisa DUDA aser Anungla Longkumer nungertemi putiotsü ajungketba aser angatetdaktsütsü merangba atema tenüngsang agütsü.
Kaketzülur Anungla Longkumer-i kaket indang teratet tatsü ka ashidang, Luchii 1, 2016 Nagaland Statehood Day amungdang lai iba mapa tenzük, ta metetdaktsü.
Iba anogo nung lai Eastern Nagaland nungi yar tsüngsanger telok ajak den ajurutep aser kaket nung nüngdakba otsü aser osangtem benden ta Anungla-isa shisem.
Sentong nung mendenji Programme officer & Joint Director DUDA Dr Anungla Imdong Phom liasü, Angam Khong-i Konyak nunger sobaliba ken ka aten aser Apong Yimchunger-i ENSF tenüng nung o jembi.
Iba sentong nung Eastern Nagaland nungi Hoho tem, ENSF, ENPO, Department Directors aser temeimertem aika aden.