Food & Civil Supplies department-i jangjashitsür

Dimapur, April 19 (TYO) : Nagaland nung National Food Security Act dak sendakba tebilemba balala lemsatepba atema Food & Civil Supplies-i sangdong ka nung osang kar jangjashitsüogo.
CAG report nung 2015 küm sen crore 402 tim mesüi amshiba onükji CAG mesüra NLA nung Public Accounts Committee (PAC) nungi department nem osang kecha mesangoktsü lir, ta Food & Civil Supplies Secretary-i sangdong nung shia lir.
Nagaland nung NFSA metenzüktetbaji senotsü peria maliba ajanga lir. Kechiyong iba ya mapa küma tenzükra, Nagaland-i mezüng küm asoshi sen lakh 1009.14 aser iba sülen küm shia sen lakh 759 agütsütsüsa akümtsü aser ibaji tamakoktsü lir, ta sangdong nungsa metetdaktsü.
Iba jagi Nagaland sorkari India sorkar dang senlem 75:25 masü saka akhi ama 90:10 inyakyim amshitsü atema temepishiba agütsü. Ajisüaka, India sorkari ibaji magizükba ajanga Nagaland nung NFSA metenzükteti aru, ta Food & Civil Supplies-isa metetdaktsü.
Union Minister-i Nagaland semdangi marudang, State Cabinet-i Nagaland nung NFSA tenzüktsü atema telemtetba agir liasü. Taküm May ita nungi Kohima aser Dimapur nung online allocation mapa tenzüktsü aser June 2016 nungbo iba district ana nung NFSA mapa küma tenzüktsü sentong lir.
Ano, July, 2016 nungi tanüngba district ajak nung NFSA mapa küma tenzüktsü aser Peren District nung mezüngbuba atema Fair Price Shop Automation mapa tenzüktsü, ta paisa metetdaktsü.
Anungji, NFSA mapa küma metenzükba aser Hill Transport Subsidy manguba ajanga jangotsü angutsüpurtem metric tonne meyirjang aika akoksaogo ta jembibaji tamagitsü lir, kechiyong NFSA metenzük yonga jangotsü tangutsü tim nguyongadang arudar, ta paisa ashi.
HTS manguba ajanga Subsidized Good Grains Delivery nunga tetsükdaktsü kecha majurur, saka HTS kübok transporters-i FCI dang sen crore 14 meshiba onükji ano metembangi lir. Ajisüaka, Union Minister aser Ministry ketdangsertem jembitepba sülen Union Minister-i tuyuba ama Special Task Force ka tentettsü aser ita asem tsüngda NTS indang onük bentettsü.
Tatemsa, Mid Day Meal Scheme ya Food & Civil Supplies department kübok maiter ta jangjashitsür, ta Food & Civil Supplies, Secretary-isa sangdong nung nenshia metetdaktsü.