Food & Civil Supplies Department-i jangjashitsür

Dimapur, December 11 (TYO): PDS jang ochimeshii amshiba inyakyim ta ser osangkaket balala nung adokba atema Department of Food & Civil Supplies, Nagaland-i sangdong ka nung iba osang jangjashitsüogo.
FCI nungi jangotsü agizüka ayutsü atema State sorkari State Stockist tem shimer aser iba ya mapang shitak nung sen manguba aser tayudak godown peria maliba khurettem ajanga lir. FCI-i mapang lemzüktsüba tsüngda Department-i jangotsü bener motetra, jangotsü sota ayur aser ibaji atema State Stockist temi Department den yaritepa parnoki jangotsü agizüker parnok godown nung ayur aser mapang shia department ketdangsertemi repranger, ta Secretary to the Government of Nagaland, Ramongo Lotha, IAS-i sangdong nung shia lir.
December 9, 2016 nü nisung telok kati mita aoba State Stockist godown nung aliba jangotsüji districts/FPS dangi belentsüba liasü, saka tang iba godown ji police-i shibangja lir. Mokokchung, Mon aser Tuensang nungdang FCI Food Storage Depots (FSD) lir aser tanüngba district tem dangi FSD Dimapur ajanga dang belenshir, ta paisa metetdaktsü.
PDS jang tangaleni belener ta tai tongloktsür, saka iba tai tongloktsüba onükji sorkar nembo memetetdaktsü. Tai tonglokja alibaji shitak süra aser ibaji metentsü asoshi kulitem peria lira, sorkari iba amala Stockist merenshitsü. Ajisüaka, kuli medenibo nisungtemi pei kabu nung ozüng mamshitettsü, ta Ramongo Lotha-isa ashi.
Shibangja aliba godown nung jang plastic bags nung enoka aliba putet ta tai tongloktsüba onük atema F&CS department-i ashiba agi, “FCI nung anguba jang bostatem loading/unloading mapang tapok apar/shisar aser jangotsü akoksar, anungji bosta nungi plastic bags nung jang melena enoktsü atema Stockist-i temelaba meshia mapa inyaker.”
October 3 & 4, 2016 anogotem Guwahati nung Northeast state tem nungi Secretary tem senden nung jangotsü akoksaba indang onük benoka lemsatep aser iba mapang Union Food Secretary-i takoksa anguba atema temenok agütsüba inyakyim lateta mali ta ashi. Anungji, takoksa majurutsü aser PHH pur tangutsü tim angutsü atema plastic bags nung melenzüka aseptsü telemtetba agi.
Taoba mapang consumer aikati bosta tapok aser jangotsü akoksaba indang osangtem sangoktsüogo.
F&CS Department-i tashishitsü melii mapa inyaktsü tangatetba nung inyaksangshir saka temulung masüba ken o kar lira, yimjakma nung terata madokdaktsüi tamasa department nem osang sangoktsütsüla, ta Ramongo Lotha, IAS-i ashi.