Football asaya meimertem

Asaya tapu ajak rongnung Naga nungertemi asayatsü dang masü saka reprangtsü dena jangraba asayaji football ya asütsü. Atangji, football asaya ya akhi Naga nunger tsüraburtemi purapiteta asayaba asaya ka masü saka tangar temesüng nisungtem nungi angazüka asaya tenzük asütsü ta bilemer. Football yanglua asayatsü purapitetba otsü aika lir saka football asayar kintem rongnung kanga jangraa aser junga asayaba kintemji Europe nungertem lir. Aji oda, Naga lima nunga kodang, kong aser shirnoki mezüng football asayatsü sayua tenzükar mejangjatetter, saka temetet British nunger arua yimsüsüba mapang parnoki mesüra America nungertemi football asayatsü Naga nungertem dang sayur asütsü ta bilemer. Naga nungertem ya lokti meimba kin ka lir, anungji asenoki telok-telok küma lemsar toktepba aser reprangba sentongtem kanga sapur. Iba ama jakla aliba agi football ya Naga nungertemi tamasayongi kanga sapua agizük südi. Naga lima nung kodang football asaya tenzük, idangjibo football alitsübaji Naga nunger asoshi jenjang tasak liasü, anungji football melena kari süjen polonger asaya aser jemben (hasü) tulu atangba mapangbo, itemji tazü ongzüka, iba jagi football kümer asaya. Ano, tanü asüng tanurtemibo menünüa bilemtsü saka Naga nungertemi tsüngsem asemtsü memetetba mapang asünungji, süjen agi yangluba football aser jemben ball-ji tsüngsem masem tetsüngtesa agi jangratema asayaa pelatep. Iba amaji süjen aser jemben ball asayaa tenzükba nungi Naga nunger kaketshirtem aika Jorhat,  Gauhati aser Kolkata nungi tenzüka India tesem balala nung kanga nüngtugu küma asayaa aruogo. Item asayartem rongnung Kolkata nung Mohun Bagan club nung captain ser asayatsüsa nüngtugu kümtetbaji Dr. T.Ao liasü. Iba  club nungji asayaba mapang 1948 küm pa nem Indian Football Team anir London Olympics nung oagi asayatsü maongka agütsü. Iba küm London Olympics nungji T.Ao captain ser aoba Indian team-ji mezüng asaya Burmese football team den asayatsü ata, saka parnokji marunungji Indiai akok aküm aser tanabuba asaya France den asaya aser iba asaya nung goal kaka agütsür lia asaya atemtsü minute ka lia France nungertemi goal ka agütsü aser iba goal jagi parnoki akok aküm. London Olympics nung asaya tashi T.Ao nungertemi tsüngsem mesemi dang football asaya. Iba jagi London nung osangbenertemi T.Ao dang, kechiba nenokbo football tsüngsem masem asayar ta menüja asüngdang dang, ” hau India nung onokbo football asayar saka yangi nenokbo bootball asayar,” ta asayamenüa langzüba agi yangji alir British nungertem kanga pelatep aser tasüngnep iba telangzübaji osangkaket ajak nung kanga nüngtugusa adoka züngtep. Iba amaji London Olympics nung T.Aoi anir India nungertem tetsüngtesa agi kanga junga asayaba ngur tepela marem England chubatsüri parnok chiyongi jaok. Iba mapang T.Ao dang Arsenal Football Club nung adentsü maongka agütsü saka pai o tajung shia magizüki yutsü. Iba sülen T.Aoi aniba India football teamji Europe lima tesem aika nung football asayatsü jaoka liasü. Taküm 2018 küm ya T.Ao sor küm 100 ajungba mong India tesem balala nung mongdagi. Iba ama nisung ka Naga lima nung asenok rongnungi adoktetba kuli jagi asenok nem football asayatsü sempet agüja lir ta jangjar. Atangji, T.Ao amaji alimai tetshitsüsa nüngtugu mekümaka Naga nunger football asayar tajung aika adokogo aser tanga lanurtem karbo kanga junga asayadagi. Tangbo süjen aser jemben ball masü saka football shitakba jenjang tasak agi alia tsüngsem tajung semer asayar. Ajisüaka, tebilemdangtsü kaji, kechiba T.Ao sülen Naga nunger kata Indian football team nung shimtettsüsa madoker? Yassüng nungi Russia nung World cup asaya tenzükogo. Idakji tia majung, India nungerbo shilem magitetter. Ajisüaka, Naga nungertemi football meimba aser jangrabaji reprangdangra, taküm World Cup ya Russia nung masü saka Nagaland nung asayar amai tesem aser gari ajak nung alima kin balala indang flag songer taküm kümsa tejangraba aser teyongyaba amai longsotepa angur. Iba tejangrabaji governmenti reprangteta yakta Nagaland tesem ajaklen asayadak stadium tajung yanglua toktsütsüla aser lanurtem nem nüngdak peria agütsür asayatsü ajungshitsüla. Iba jagi dang ano Naga nunger rongnung T.Ao adoktettsü.