Foothill Ao Youth Organization, Dimapur ajanga teyari agütsü

Dimapur, Rongchii/April 20 (TYO): COVID-19 tashidak wara mechi linük ajunga nung anemponga aliba mapang Foothill Ao Youth Organization, Dimapur (FAYO) ajanga parnok aliba tesemtem (NAGAUNITED -NIULAND, KUHUBOTO- SEITHEKEMA) nung nüburtem nem jang-o-tzü teyari agütsü.
FAYO tir, Tuden Jamir-i sangdong ka ajanga ashiba agi, maneni anempongba ajanga kibong aika tim atemer. Parnoki kibong 400 shi nem jang-o-tzü lema agütsü.
Teyari agütsütsüpu tenüngtem ya tesem balala nungi benden aser ration card malirtem aser tepetzük jenjang nung aliba aayangertem nem iba teyari ya agütsü, ta osang ajanga ashi.
Lokti aser kija-kibong kwikati iba ama timtemba mapang teyari agüja timtemer dang aria bilema yaritepogo, nenok ajak dang kanga pelar, ta FAYO sangdong ajanga ashi.
Item ama lenir tajung ajanga tain tanur ajak ajungmesor aser Tsüngrem tenüng asanger, ta parnoksa ashi.
FAYO ajangasa nüburtem dang, COVID-19 tashidak wara koktettsü mechi sorkari totuyuba agütsübatem shidak amshia aotsü asoshi nübur ajunga dang ayongzüka liasü.
Timtem nung aliba mapang nüburtem asoshi tenla agütsür tenüngtem yamai alitsü:
(1) Dimapur Ao Lanur Telungjem (DALT), (2) Dr Longrinuken, Advisor, Law & Justice, Border Affairs aser Treasurers And Account, (3) Temjenmoa, Chairman Managing Director, Mineral and Mining, (4) Er Achakbou Newmai (Kohima), (5) Dr Chubatola, Principal, C- Edge College (Naga United), (6) Taongnukshi, Merangkong (FALT Treasurer), (7) Imkongnungsang, (Waromung), Diphupar A, (8) Imlitoshi, (Waromung) Naga United, (9) Limatemjen (Changki) Kohima, (10) Yanger Longkumer, Naga United.