Forbes List nung India tsürtem rongnungi Sindhu kija lir

New York, Luroi/ August 7, (Agencies): India tsürtem rongnungi nüngtugu badminton asayar PV Sindhu kija tawa sangdongba world’s highest-paid female athletes Forbes list nung züngoksema lir. Iba list nung Serena Willams temaba jenjang nung lir.
USD million 5.5 aazükba sülen Forbes-i Mongolbarnü sayaba Highest-Paid Female Athletes 2019 list nung Sindhu jenjang 13buba nung lir.
“India tsür asayartem rognungi Sindhu kija züngoksema lir. La ya India nunger rongnungi BWF World Tour finals akoker mezüngbuba asayar lir,” ta Forbes-i ashi.
World’s top 15 female athletes list nung Williams temaba jenjang nung lir, lai USD million 29.2 aazüka liasü. Forbes-i ashiba agi, arishi küm 37 tain Williams taruba küma maneni asayatsü sentong lir saka clothing line, ‘S by Serena’ lapoktsü sentong yangludar aser 2020 tatem tashi nungbo jewellery aser beauty products line tem amenoktsü sentong lir. Laisa USD million 10 alang venture portfolio ka tenzükogo.
Tanabuba jenjang nung Naomi Osaka lir, shibai 2018 US Open nung Grand Slam 23 tashi koker alila Williams tsükdakja liasü. Lai USD million 24,3 aazüka liasü.
Forbes-i ashiba agi, lai aazükba rongnung 2018 küm June ita nungi 2019 tashi nung asayamung akokba senpet, itasen, bonus, endorsements aser appearance fees densema lir. Iba mapang tsüngda tetsür asayar parnok 15-i USD million 5 aazükogo aser teburtem den medemdangra parnok 1,300-ibosa kasa mapang tatakzük nung USD million 5 aazüktsü imlar.
Temaba jenjang nung aliba asayar 15 senteper USD million 146 aazükogo koba taoba küm USD million 130 liasü.
Williams aser Osaka nati tasembuba jenjang nung aliba asayar dang nungi anasü agi timba aazüka liasü. Tasembuba jenjang nung ya Angelique Kerber lir aser lai tennis asayaba nungi USD million 11.8 aazüka liasü.
Forbes-isa, tetsür asayartem atema sen million aika aazüktsü asoshi tennis asaya ya tajungtiba lir. Soccer, basketball aser softball asayartem teburtem den medemdangra kanga agi tajemba aazüker, ta ashi.
Team asaya nung itasen nung tsüngda aika ita liaka tanü asüng tetsürtem atemaa lenmang aika lapoka odar aser iba ya social media platforms renloka aoba ajanga lir, ta Wasserman nung Olympics aser female athletes divisions tekolakba Dan Levy-i ashi.
Pro athletes tem fan den sendakteptsü asoshi network TV dak metaloker malir, ta Levy-i ashi. Iba temelenshi kija ajanga tetsürtem saisapong balala shishilembaba nung tali tashi taitba kümogo.