Foreign Secy senden nung Pakistan-i Kashmir onük benok

New Delhi, April 26 (Agencies):  Mongolbarnü New Delhi nung Foreign Secretary-level senden nung Pakistan linüki maneni Kashmir ken o benoka liasü.
Pakistan Foreign Secretary, Aizaz Ahmed Chaudhry-i India Foreign Secretary, S Jaishankar den senden amendang Kashmir onük ya latettsüla, ta benok.
Chaudhry ya Heart of Asia (Istanbul Process) conference on Afghanistan senden nung adentsü atema tang Delhi-i arua lir aser iba senden metenzükdang tanü pai Indian Foreign Secretary ajurua senden menogo.
Linük ana Foreign secretary senden amenba sülen Delhi nung aliba Pakistan High Commission-i, Jaishankar aser Chaudhry na senden amendang Kashmir onük densema tongtibang onüktem jembi, ta ashi.
High Commission-isa, “Pakistan Foreign Secretary-i UNSC bangzüngtem aser Kashmir nungeri mulungba nung ajemdaker Kashmir onük latettsü ya tongtibang onük ka lir ta shiogo,” ta metetdaktsü.
Ano külen Chaudhry-i Comprehensive Bilateral Dialogue tekaraba nung tenzüktsü atema benok.
Taküm January 2 nü kiralongrartemi Punjab nung Pathankot air base amakba sülenbo tang mezüng linük ana nungi tongti ketdangser senden menogo, ajisüaka iba senden nung Pathankot amakba ken o süoka jembi asü mejembi’ar mejangjar.
Yaküm October ita nung Pakistan aser Afghanistan nati ayongzükba Heart of Asia ministerial senden nung adentsü atema External Affairs Minister, Sushma Swaraj-i Pakistan yimtiba, Islamabad semdangdang linük ana tsüngda senden asentenshir tenzüka liasü, ajisüaka taküm kiralongrartemi Pathankot amakba sülen linük ana tsüngda senden thinena ayu. Iba mapang nung linük anapronglai Comprehensive Bilateral Dialogue senden tenzüktsü atema bangjema liasü.